Қозоғистонда аёл TikTok’ка жойлаган видеоси туфайли миллатлараро адоват қўзғатганликда айбланиб, икки йилга озодликдан маҳрум қилинди. Бу ҳақда “Озодлик” радиоси хабар берди.
Жансулу Дархамбаева ижтимоий тармоққа видео жойлаб, унда Россия президенти Владимир Путинга мурожаат қилганди. У 2025 йилда Россия Қозоғистондан ижарага олган ерлар муддати тугашини айтиб, “бу ерларни қайтариш”ни талаб қилган. Шунингдек, Қозоғистоннинг чегарадош ҳудудларини Россиядан қайтариб олиш кераклиги ҳақида гапирган.
Орадан бир неча ой ўтиб, у миллатлараро адоват қўзғатганликда айбланиб судга тортилган. Экспертиза видеода “рус миллатига мансуб фуқароларнинг миллий шаъни ва қадр-қимматини таҳқирлаш (камситиш) белгиларини” кўрган.
Суд Дархамбаева бу видеони “атайлаб жойлаган, унинг рус миллатига қарата айтган сўзлари кенг оммага тарқалиши мумкинлигини тушунган ва бу билан ижтимоий адоват қўзғатишни мақсад қилган” деган хулосага келган. Иш ҳужжатларида айбланувчининг “айбига тўлиқ иқрор бўлгани ва қилмишидан чин дилдан пушаймон экани” ҳам қайд этилган.
2025 йил 20 май куни Петропавловск шаҳрида ўтган суд Дархамбаевани икки йилга озодликдан маҳрум қилишга ҳукм қилган. У тўғридан-тўғри суд залида қўлга олиниб, тергов изоляторига юборилган.
Аёлнинг укаси суд ҳукмини инсонпарварлик ва адолат тамойилларига зид деб атаган. Унинг айтишича, суд бу қарорни “жамоатчилик резонанси” асосида чиқарган, ҳолбуки ижтимоий тармоқларда кўпчилик Дархамбаевани қўллаб-қувватлаган. Аёлнинг адвокати Кабдолахмет Искандиров эса апелляция тартибида шикоят киритганини айтган.
Изоҳ (0)