Украина Хавфсизлик хизмати Россияга қарши “Ўргимчак тўри” каби янги операцияларга тайёрланмоқда. Бу ҳақда разведка манбаларига таянган ҳолда The Washington Post хабар берди.
Хабарга кўра, можаронинг ҳар икки иштирокчиси узоқ вақтдан бери “урушнинг боши берк кўчасидан чиқишга интилмоқда”. Украинанинг “Ўргимчак тўри” операцияси эса “музокаралар столини янгидан ишга тушириш” учун жасоратли уриниш бўлди.
Украина Хавфсизлик хизмати ва Разведка бошқармаси уч йилдан ортиқ вақт давомида Украина махсус бўлинмаларининг “Мен ортингдан бораман” шиорини амалга ошириш устида ишламоқда. Улар урушни Россия ҳудудига кўчириш бўйича операциялар ўтказган. Шунингдек, бошқа мамлакатларда Россиянинг кучлари ва халқаро ҳамкорларига қарши ҳам ҳаракат қилган, дея ёзади WP.
Таъкидланишича, мақсад кутилмаган жойларга зарбалар бериб, Россияни “Украинадаги фронт чизиғидан анча узоқда қон тўкишга” мажбур қилиш бўлган. Ҳозирда “Ўргимчак тўри”га ўхшаш янги операцияга тайёргарлик кетаётгани маълум қилинган.
“Ўргимчак тўри” операцияси
Украина Хавфсизлик хизмати 1 июнь куни Россиянинг бешта авиация базаларига қарши кенг кўламли махсус операция ўтказди. Унинг мақсади Россия стратегик авиациясини, хусусан, Украина шаҳарларига мунтазам равишда ҳужум қилган қанотли ракета ташувчиларини ишдан чиқариш эди.
Операция бир ярим йилдан кўпроқ вақт давомида тайёрланган ва пухта режалаштирилган. Ҳужумлар Россияда тўхтаб турган юк машиналаридан учиб чиққан дронлар ёрдамида амалга оширилган. Бу эса Украина чегарасидан узоқ масофада зарбалар беришга имкон берган.
АҚШ разведкаси маълумотларига кўра, етказилган зарар “сезиларли” бўлган, бироқ унинг кўлами ҳали баҳоланмоқда Оқ уйдаги манбалар ҳужумлар натижасида Россия камида олтита узоқ масофали Ту-95, камида тўртта Ту-22М бомбардимончи самолётларини, шунингдек, ҳар бири 300 миллион доллар қийматидаги бир нечта А-50 радиолокацион назорат самолётларини йўқотганини маълум қилган.
Ғарб экспертлари фикрича, бу операция урушда бурилиш нуқтаси бўлиши мумкин ва Украинанинг Россиянинг стратегик объектларига зарба бериш қобилиятини намойиш этади. Операцияга 117 та дрон жалб қилинган. Улар Россиянинг стратегик қанотли ракета ташувчиларининг 34 фоизини йўқ қилган.
Зеленский операциянинг “офиси” Россия вилоятларидан бирида Федерал хавфсизлик хизмати бошқармаси ёнида жойлашганини айтган. Украина президенти “ноёб операция” учун хавфсизлик хизмати ходимларига миннатдорлик билдирган.
Изоҳ (0)