Ukraina Xavfsizlik xizmati Rossiyaga qarshi “O‘rgimchak to‘ri” kabi yangi operatsiyalarga tayyorlanmoqda. Bu haqda razvedka manbalariga tayangan holda The Washington Post xabar berdi.
Xabarga ko‘ra, mojaroning har ikki ishtirokchisi uzoq vaqtdan beri “urushning boshi berk ko‘chasidan chiqishga intilmoqda”. Ukrainaning “O‘rgimchak to‘ri” operatsiyasi esa “muzokaralar stolini yangidan ishga tushirish” uchun jasoratli urinish bo‘ldi.
Ukraina Xavfsizlik xizmati va Razvedka boshqarmasi uch yildan ortiq vaqt davomida Ukraina maxsus bo‘linmalarining “Men ortingdan boraman” shiorini amalga oshirish ustida ishlamoqda. Ular urushni Rossiya hududiga ko‘chirish bo‘yicha operatsiyalar o‘tkazgan. Shuningdek, boshqa mamlakatlarda Rossiyaning kuchlari va xalqaro hamkorlariga qarshi ham harakat qilgan, deya yozadi WP.
Ta’kidlanishicha, maqsad kutilmagan joylarga zarbalar berib, Rossiyani “Ukrainadagi front chizig‘idan ancha uzoqda qon to‘kishga” majbur qilish bo‘lgan. Hozirda “O‘rgimchak to‘ri”ga o‘xshash yangi operatsiyaga tayyorgarlik ketayotgani ma’lum qilingan.
“O‘rgimchak to‘ri” operatsiyasi
Ukraina Xavfsizlik xizmati 1-iyun kuni Rossiyaning beshta aviatsiya bazalariga qarshi keng ko‘lamli maxsus operatsiya o‘tkazdi. Uning maqsadi Rossiya strategik aviatsiyasini, xususan, Ukraina shaharlariga muntazam ravishda hujum qilgan qanotli raketa tashuvchilarini ishdan chiqarish edi.
Operatsiya bir yarim yildan ko‘proq vaqt davomida tayyorlangan va puxta rejalashtirilgan. Hujumlar Rossiyada to‘xtab turgan yuk mashinalaridan uchib chiqqan dronlar yordamida amalga oshirilgan. Bu esa Ukraina chegarasidan uzoq masofada zarbalar berishga imkon bergan.
AQSH razvedkasi ma’lumotlariga ko‘ra, yetkazilgan zarar “sezilarli” bo‘lgan, biroq uning ko‘lami hali baholanmoqda Oq uydagi manbalar hujumlar natijasida Rossiya kamida oltita uzoq masofali Tu-95, kamida to‘rtta Tu-22M bombardimonchi samolyotlarini, shuningdek, har biri 300 million dollar qiymatidagi bir nechta A-50 radiolokatsion nazorat samolyotlarini yo‘qotganini ma’lum qilgan.
G‘arb ekspertlari fikricha, bu operatsiya urushda burilish nuqtasi bo‘lishi mumkin va Ukrainaning Rossiyaning strategik obyektlariga zarba berish qobiliyatini namoyish etadi. Operatsiyaga 117 ta dron jalb qilingan. Ular Rossiyaning strategik qanotli raketa tashuvchilarining 34 foizini yo‘q qilgan.
Zelenskiy operatsiyaning “ofisi” Rossiya viloyatlaridan birida Federal xavfsizlik xizmati boshqarmasi yonida joylashganini aytgan. Ukraina prezidenti “noyob operatsiya” uchun xavfsizlik xizmati xodimlariga minnatdorlik bildirgan.
Izoh (0)