Кўпчиликка маълумки, актёрлар кўп трюкларни ўзлари бажармайди. Бу кўпинча хавфсизлик нуқтайи назаридан қилинади. Чунки агар актёр жароҳатланса, суратга олишни кечиктиришга тўғри келади ва фильм катта зарар кўради. Баъзи актёрлар эса жисмоний имкониятлари туфайли мураккаб элементларни бажара олмайди. Аммо Голливудда трюкларнинг аксариятини мустақил равишда бажарадиган актёрлар ҳам бор.
Том Круз
Трюклар қироли Том Круз “Уддалаб бўлмас топшириқ” фильмидаги Итан Хант ролида энг мураккаб элементларни бажаришни бошлаган.
Жангари фильм давомида у хавфсизлик тўрисиз мустақил равишда қояга чиқади. Ҳар янги фильмда Круз янада кўпроқ таваккал қилади ва мухлисларни ўз қобилиятлари билан лол қолдиради.
Унинг фильмографиясида Дубайдаги 828 метр баландликдаги Бурж Халифа осмонўпар биноси ташқи девори бўйлаб югуриш алоҳида ўрин эгаллайди. Томошабинлар буни “Уддалаб бўлмас топшириқ: Арвоҳ протоколи” фильмида кўришлари мумкин. Бундан олдин Крузга бунинг иложи йўқлиги ва саҳнадан воз кечиш кераклиги айтилганди. Суратга олиш пайтида баландликда кучли шамол эсаётган бўлса-да, у ҳар доимгидек дублёрсиз буни уддалайди.
Бундан ташқари актёр “Уддалаб бўлмас топшириқ: Қувғиндилар қабиласи” фильмида Том Круз учиб кетаётган самолётда осилиб, ҳавонинг кучли қаршилигини енгиб ўтади.
Қоялар орасида вертолётда учиш, дубулғасиз мототциклда соатига 200 километр тезликда юриш, 8 километр баландликдан сакраш — бу Крузнинг кинода каскадёрларсиз ўзи бажарган ишларининг тўлиқ рўйхати эмас. Ҳаёт учун хавфли бўлган бундай саҳналарга тайёргарлик кўриш учун ойлаб вақт кетади. Бироқ актёр кинода имкон қадар ҳақиқатни кўрсатиш кераклигига ишонади, бу борада унга тенг келадигани йўқ.
Киану Ривз
Киану Ривз карьерасининг бошида кўпроқ комедия актёри сифатида танилган. Кейинчалик уни жангари фильмларга таклиф қила бошлашди, у ерда бошқа кўплаб ижрочилардан ўзининг фарқли жиҳатини дарҳол намоён этди - бу аксарият трюкларни мустақил равишда бажара олиш қобилияти эди.
Актёр ўзининг биринчи “Тезлик” жангари фильмида машинадан автобусга хавфли сакрашни амалга оширган. Кейинчалик машҳур “Матрица” фильмида у жанг санъатидаги ажойиб маҳоратини намойиш этди. Шунингдек, у томошабинларга ўқлардан қочиш саҳнасини тақдим этди. Бу фақат ташқи томондан оддий кўриниши мумкин. Аслида бундай ҳаракатлар нафақат юқори даражадаги эгилувчанлик, балки куч ҳам талаб қилади.
Бутун фаолияти давомида Ривз аксарият трюкларни каскадёрлар ёрдамисиз бажарган. Ҳозир у 60 ёшга кирган бўлса-да, ҳамон ажойиб жисмоний ҳолатда.
Жеки Чан
Жеки Чан карьерасини каскадёр сифатида бошлаган. Шу боис у бу касбнинг барча нозик жиҳатларини яхши билади.
Оммавий трюкларда ишлагач, Жеки Чан ўзи ҳам ролларга таклиф қилина бошлади. Дастлаб ёш актёр “Бургут соясидаги илон” жанговар комедиясида, кейинроқ “Сархуш уста” фильми экранларга чиқди, унда ҳам у дублёрларсиз ишлади.
Жеки Чан нафақат барча трюкларни ўзи бажарарди, балки бутун каскадёрлар жамоасига раҳбарлик қиларди. Унинг сермазмун фаолияти давомида у турли мураккабликдаги сон-саноқсиз трюкларни амалга оширди.
Албатта, бу саҳналар жароҳатларсиз бўлмади. Жеки Чан беш метр баландликдан йиқилганда, танасининг деярли барча қисми шикастланган. Яна бир суратга олиш пайтида у йиқилиб, бошини тошга уриб олади. Бу унинг ҳаётига хавф солиши мумкин эди. Актёр операция қилдиришга мажбур бўлади ва суратга олиш ишлари бир йилга кечиктирилади, бироқ у соғайганидан сўнг ишни давом эттиради.
Бугунги кунда Жеки Чан экранларда камроқ кўринаётган бўлса-да, Гиннеснинг рекордлар китобига энг кўп трюкларни мустақил бажарган актёр сифатида киритилган.
Эмили Блант
Том Круз истеъдодининг бир қисми Эмили Блантга ўтган. Улар “Келажак чегараси” фильмида бирга рол ижро этган. Илмий-фантастик блокбастер сюжетига кўра, бош қаҳрамонлар ўзга сайёраликлар билан жанг қилишлари лозим. Вақт ҳалқасининг узилиши сабабли Круз қаҳрамони ҳар сафар ҳалок бўлгач, жанг бошидан бошланади.
Бу рол учун актриса илгари ҳеч қачон бундай пухта тайёргарлик кўрмаган. Фильмда унинг қаҳрамони Рита Вратаски 38 кг оғирликдаги экзоскелет кийиб юради. Шунчаки кийиб юрмай, доимо унда югуради ва жанг қилади.
Блант аксарият саҳналарни, жумладан ўзини ва ҳамкасбини ҳақиқий хавф остига қўйган эпизодни ҳам ўзи ижро этган. У микроавтобусни бошқара олмай, катта тезликда дарахтга урилган. Актёрлар мўжиза туфайли жароҳатланмай қутулиб қолган. Бироқ Блант ҳатто Том Круз каби моҳир трюк ижрочиси олдида ҳам ўзини йўқотиб қўймаган ва унинг даражасида ҳаракат қилган.
Изоҳ (0)