Кўпчилик “Сеними, шошмай тур!” мультфильми совет декорациялари фонида бўри билан қуённинг беозор қувлашмачоқ ўйинидан иборат ажойиб мультфильм деб ҳисоблайди. Аммо унга бошқа томондан қаралса-чи?
Ижтимоий тармоқларда оммалашган бир назарияга кўра, “Сеними, шошмай тур!” мультфильмида одамлар йўқ. Шаҳарлар, кўчалар, қаҳвахоналар, пляжлар - барчаси ақлли антропоморф ҳайвонлар билан тўлган. Аммо архитектура, транспорт, техника — барчаси аниқ инсонларга хос ўлчамларда. Лекин энг даҳшатлиси бу эмас.
Серияларнинг бирида қаҳрамонлар музейга тушиб қолганида, жангчиларнинг манекенлари инсон қиёфасида ясалганини кўрамиз. Демак, бу оламда одамлар мавжуд бўлган... аммо йўқолиб кетган.
Назарияга кўра, бунинг ягона изоҳи: одамлар биологик қурол таъсирида бутунлай қирилиб кетган. Вайрон бўлган бинолар, ёниб кул бўлган кўчалар ёки ядро урушининг излари кўринмайди - ҳамма нарса бут, гўё цивилизация бир зумда ғойиб бўлиб, шаҳарлар бўм-бўш қолгандек. Ақлли ҳайвонлар эса уларнинг ўрнини эгаллаб, турмуш тарзи, кийим-кечак, транспортни ўзлаштириб олган ва худди шундай бўлиши керакдек ҳаёт кечиришмоқда.
Шу нуқтаи назардан, мазкур мультфильм беғубор болалар ҳикояси эмас, балки сайёравий фожиа якуни ҳақидаги мультфильмдир. Қаҳрамонлар бир-бирларини қувлашади, кулишади, соҳилда дам олишади, аммо уларнинг оёқлари остидаги ер ўзларидан олдин яшаб, бир лаҳзада ҳалок бўлганларнинг кули билан тўйинган. Улар ўтмишдаги фожиа изларини босиб юрганларини билмай, бир-бирини қувлашда давом этади.
Изоҳ (0)