Тошкентда бир киши бир кунда ўртача 230–270 литр ичимлик суви сарфлайди — “Ўзсувтаъминот” АЖ вакили

Тошкентда киши бошига кунига 230–270 литр сув сарфланади. Бу Республика миқёсидаги энг юқори кўрсаткич ҳисобланади. Бу ҳақда “Ўзсувтаъминот” акциядорлик жамияти матбуот котиби Акмал Муродов “Дарё” билан суҳбатда айтиб ўтди.

Муродовга кўра, сув тақсимоти бўйича республикадаги энг паст кўрсаткич кунлик 80–100 литр билан Қашқадарё вилоятига тўғри келади. Умуман, дунё стандартлари бўйича кунига 120–150 литр сув ишлатиш ҳам кўп ҳисобланади.

“Сув тақсимоти аҳолининг жойлашувидан келиб чиқиб, турлича кўриниш олган. Мисол учун, Тошкент шаҳрида киши бошига 230 литрдан 270 литргача ичимлик суви сарфланади. Вилоятлар миқёсида энг паст кўрсаткич Қашқадарёда бўлиб, жон бошига 80–100 литр сув ишлатилади. Дунё тажрибасида аҳоли жон бошига 120–150 литр сув ишлатилса ҳам бу юқори рақамлар ҳисобланади. Европанинг ривожланган давлатларида ҳам шундай. Бу улар сувни кам истеъмол қилади дегани эмас. Шунчаки, улар сувни тежаб, онгли равишда ишлатади”, дейди Муродов.

Унинг фикрича, ушбу кўрсаткич сув захираларининг аксар қисми қўшни давлатга боғлиқ ҳолда бўлган давлат учун фожиадир.

“Афсуски, Ўзбекистонда ичимлик суви билан транспорт воситалари, гиламлар ювилади. Ёз ойларида бассейнлар тўлдирилиб, икки кун чўмилмасдан канализация ва ариқларга оқизиб юборилади. Сув захираларининг 20 фоизигина ўзида шаклланадиган мамлакат учун бундай муносабат фожиа. Мени доим шу нарса ҳайрон қолдиради”, дейди “Ўзсувтаъминот” АЖ матбуот котиби.

Ўзбекистон Сув хўжалиги вазирлиги тақдим этган маълумотларга кўра, 2030 йилга бориб Ўзбекистонда 7 миллиард куб метр сув етишмовчилиги пайдо бўлиши мумкин.

Мамлакатдаги сув таъминоти бўйича инфратузилма объектларининг аксарияти 30 ёки 40 йил аввал бунёд этилган. Ҳозирда уларнинг кўпчилиги таъмирга муҳтож. Умуман олганда, Ўзбекистонда сувни тежаш борасидаги барча лойиҳалар 19 миллиард долларни талаб қилиши мумкин. Шундан 4 миллиард — насос станциялари, 6 миллиардга яқини эса хўжалик субъектларига сув тежовчи технологияларни жорий этишга субсидиялар учун кетади.

Сув билан боғлиқ муаммолар фақат Ўзбекистонгагина тегишли эмас. Жаҳон метеорология ташкилоти ҳисоботига кўра, 2050 йилга бориб ер юзида 5 миллиарддан ортиқ одам у ёки бу даражада сув танқислигини бошдан кечиради.

Бирлашган Миллатлар Ташкилотининг ҳисоботига кўра, дунё аҳолисининг 2,4 миллиард нафари ҳозирнинг ўзида сув танқислигидан азият чекади. Дунё аҳолисининг 50 фоизи йилига камида бир ой сув етишмовчилигига дучор бўлади. 500 миллион одам эса доимий сув танқислиги шароитида кун кечиради.