Шавкат Мирзиёев 5 август куни Туркманистоннинг “Ҳамкорликни ривожлантиришга қўшган ҳиссаси учун” ордени билан мукофотланди. Бу ҳақда президент матбуот хизмати хабар берди.
-1v9phF-K.avif)
Орденини тантанали топшириш маросими БМТнинг Денгизга чиқиш имкони бўлмаган ривожланаётган мамлакатлар бўйича учинчи конференцияси доирасида бўлиб ўтди.
Давлат раҳбари Туркман халқининг миллий етакчиси, Халқ Маслаҳати раиси Гурбангули Бердимуҳамедовга, Туркманистон президенти Сердар Бердимуҳамедов ва қардош туркман халқига юксак давлат мукофоти учун миннатдорлик билдирди.
-dbdhk20e.avif)
“Ушбу мукофотни Ўзбекистон ва унинг кўп миллатли халқига алоҳида эътибор ва ҳурмат, Марказий Осиё минтақасида дўстлик, яхши қўшничилик, ўзаро ишонч ва шериклик муносабатларини мустаҳкамлаш борасидаги умумий саъй-ҳаракатларимизнинг эътирофи сифатида қабул қиламан”, деди Шавкат Мирзиёев.
Ўзбекистон етакчиси Арқадағ ва минтақанинг барча давлатлари раҳбарлари Марказий Осиёда ҳамкорликни илгари суришга улкан ҳисса қўшаётганини алоҳида қайд этди. Бугун бутун халқаро ҳамжамият минтақавий шериклик ва ўзликнинг янги моделини барпо этишдаги умумий муваффақиятларимизни эътироф этаётгани таъкидланди.
Сўзининг якунида давлат раҳбари юксак мукофот учун яна бир бор миннатдорлик билдириб, қардош туркман халқини шу кунларда ўтаётган БМТ конференцияси билан табриклади ҳамда жорий йил декабрь ойида Ашхобод шаҳрида Халқаро тинчлик ва ишонч йили доирасидаги глобал саммит муваффақиятли ўтишини тилади.
“Ҳамкорликни ривожлантиришга қўшган ҳиссаси учун” ордени тўғрисида
Ушбу орден Туркманистонда 2017 йил 30 сентябрда таъсис этилган. Мукофот хорижий давлатларнинг таниқли давлат ва жамоат арбобларига халқлар ўртасида тинчлик, дўстлик, ҳамкорлик ва ўзаро тушунишни мустаҳкамлашдаги алоҳида хизматлари, шунингдек, Туркманистоннинг хорижий давлатлар билан иқтисодий, илмий-техникавий ва маданий ҳамкорлигини ривожлантиришга катта ҳисса қўшган шахсларга берилади.
Бугунги кунга қадар 4 хорижий давлат арбоби орден билан тақдирланган:
- Россия президенти Владимир Путин (2017 йил 1 октябрь);
- Туркия президенти Ражаб Тоййиб Эрдўғон (2021 йил 29 ноябрь);
- Россия Федерал мажлиси федерация кенгаши раиси Валентина Матвиенко (2022 йил 12 май);
- Озарбайжон Миллий Мажлиси раиси Соҳиба Гафарова (2022 йил 8 декабрь).
Ўзбекистон президенти хорижий давлатларнинг бошқа нуфузли медал ва орденлари билан ҳам тақдирланган. Жумладан, Қирғизистоннинг “Данакер” ордени (2017 йил 22 ноябрь) Қозоғистоннинг “Дўстлик” ордени (2018 йил 14 март), Россиянинг “Александр Невский” ордени (2022 йил 15 сентябрь) Франциянинг “Фахрий легион” ордени (2025 йил 13 март).
Изоҳ (0)