Актёрлик касбида нафақат истеъдод, балки жасорат ҳам талаб этилишини Голливуд юлдузлари яхши билади. Айниқса, ўзининг жозибали ташқи кўриниши билан танилган актёрлар экранда бутунлай бошқа — ғайриоддий, хунук ёки кекса образларни гавдалантириши алоҳида таҳсинга лойиқ. Қуйида яқиндан қараганда ҳам таниб бўлмас даражадаги ролларни ижро этган ва мухлислар кўнглини янада забт этган актёрлар ҳақида маълумот берилади.
Жейкоб Элорди
Netflix’нинг жорий йил ноябрь ойида намойиш этилиши кутилаётган “Франкенштейн” номли даҳшатли фильмида актёр Жейкоб Элорди бош ролда — Франкенштейн образида пайдо бўлади. Грим усталари Элордини шу даражада ўзгартиришганки, трейлерни кўрган ҳатто энг ашаддий мухлислар ҳам уни танимай қолмоқда. Кадрдаги сурат билан Элордининг асл кўриниши орасида ҳеч қандай ўхшашлик қолмаган.
Жаред Лето
“Gucci уйи” номли криминал драмада мухлислар ҳашамат ва эстетик мода муҳитини кутган эди, бироқ кексайган Жаред Лето образини кўриб, томошабинлар ҳайрон қолишди. Фильмда актёр қариб қолган, сочлари тўкилиб кетган ва бир оз семириб қолган моделер — Паоло Гуччи образида гавдаланади. Визажистлар бу рол учун унинг юзини таниб бўлмас даражада ўзгартирган ва бунинг уддасидан чиққан ҳам.
Билл Скарсгард
Стивен Кингнинг машҳур “У” асари асосида суратга олинган фентези драмасида бош қаҳрамон Пеннивайс ролини Билл Скарсгард ижро этган. Масхарабоз образининг мудҳиш юз ифодаси, қатор-қатор тишлари ва ваҳимали нигоҳи томошабинларни ларзага солган. Агар мухлислар Билл Скарсгард фильмда иштирок этишини олдиндан билмаганида эди, кўплар бу актёрни танимаган бўларди.
Глен Пауэлл
2025 йил сентябрь охирида премераси бўлиб ўтиши режалаштирилган “Чад Пауэрс” сериалда Глен Пауэлл бош роллардан бирини ўйнайди. Бу сафар актёр қўрқинчли қиёфада бўлмайди, лекин одатдаги келишган кўринишидан бутунлай бошқача тарзда: узун сочли, қавариқ бурунли, ёноқлари эса тўлишган ҳолатда намоён бўлади.
Бредли Купер
“Maestro” фильмида Бредли Купер машҳур бастакор Леонард Бернштейн ролини ижро этган. Фильмда у икки хил вақтдаги бир образ акс этади. Ёшликдаги саҳналарда актёр асл кўринишида бўлса, ҳозирги замондаги саҳналарда эса Купер махсус грим ёрдамида кекса қиёфада рол ўйнаган.
Эбон Мосс-Бакрак
“Фантастик тўртлик: Илк қадамлар” фильмида Эбон Мосс-Бакрак махлуқ кўринишидаги Бен Гримм ролини ижро этган. Унинг қиёфаси шу қадар ўзгарган ва компьютер графикалари билан тўла эди-ки, актёрни таниш деярли имконсиз бўлган.
Колин Фаррелл
Колин Фаррелл “Пингвин” фильмида жиноят оламининг вакили — Освалд Кобблпот образини гавдалантирган. Грим усталари унинг юзига чуқур чандиқлар, бошига тепакаллик ва баданига бир неча ўн килограмм “ортиқча вазн” қўшгач, актёр экранда буткул бошқа одамга айланган.
Изоҳ (0)