АҚШ собиқ президенти Жо Байден Чикагодаги Америка ҳуқуқшунослари ассоциацияси йиғилишида сўзлаган нутқида Дональд Трамп маъмурияти даврида “қора кунлар” келиши ҳақида огоҳлантирди.
“Буни бўяб кўрсатиб бўлмайди. Бу қора кунлар”, деди Байден.
Нашрнинг қайд этишича, у Трампни бевосита тилга олмаган, аммо илгари уни демократия ва қонун устуворлигига таҳдид деб атаган.
Собиқ президентнинг айтишича, АҚШ “ҳаётий кураш” олиб бормоқда.
“Сизларнинг кўпчилигингиз бу мамлакат ўзининг олий идеалларига мос келиши учун курашгансиз. 1960 йилларнинг шиддатли давридан бери бу кураш миллат сифатида кимлигимизни аниқлаш учун бундай ҳаётий аҳамиятга эга бўлмаган ва эзилган гуруҳларга шунчалик кескин ҳужум қилинмаган эди”, деди Байден.
Оқ уйнинг собиқ раҳбари ҳозирги маъмуриятни “ҳақиқатни йўқ қилишга” уринаётгани учун танқид қилган ва Конгрессни “четда ўтириб”, ҳокимиятни назорат қила олмасликда айблаган.
“Дўстларим, биз ҳозирги маъмурият ҳақидаги аянчли ҳақиқатга юзма-юз келишимиз керак. У менинг маъмуриятим даврида эришган барча ютуқларимизни йўққа чиқаришга уринмоқда”, деган собиқ президент.
Шунингдек, у Трамп маъмуриятининг муҳожирлар, юридик фирмалар ва оммавий ахборот воситаларига қарши ҳужумларини қоралаган.
“Биз баъзи сиёсатчиларимизнинг бу мамлакатда қонуний равишда яшовчи муҳожирларни оилаларидан ажратиб, улар билган ягона уйдан қўлларида кишан билан олиб кетилаётганини кўриб, очиқчасига хурсанд бўлганларини кўряпмиз. Биз юридик фирмаларнинг қонуннинг адолатлилигига қатъий риоя қилиш ўрнига босимга бўйсуниб, золимларга ён бераётганини кўриб турибмиз”, деди Америка собиқ раҳбари.
Байденнинг таъкидлашича, АҚШ тарихида улар “эриша олмаган” “ҳеч нарса бўлмаган”.
“Биз ҳар бир инқироздан ундан олдинги ҳолатимизга қараганда кучлироқ чиққан дунёдаги ягона давлатмиз”, дея хулоса қилган Байден.
Июль ойида Байден баъзи Европа етакчилари унга қўнғироқ қилиб, ҳозирги сиёсий жараёнга “қўшилишни” сўраётганини билдирганди.
Бундан олдин АҚШ президенти Дональд Трамп Байденни АҚШ тарихидаги энг ёмон президент деб атаган, шунингдек, бошқа собиқ президентлар — Барак Обама ва кичик Жорж Бушни ҳам танқид қилган эди. Трамп фақат ўзигагина юқори баҳо берган.
5 июнь куни Трамп Байденнинг соғлиғи бўйича текширув ўтказишни буюрди. Хусусан, у собиқ президент ёрдамчиларининг унинг соғлиғи ҳақидаги маълумотларни яширган-яширмаганини аниқлашни истади. Шунингдек, Америка раҳбари демократ ёрдамчиларининг ҳужжатларни имзолаш учун автоматик қалам ишлатган-ишлатмаганини текширишни ҳам буюрди.
Изоҳ (0)