“Челси”да катта “тозалаш”: клуб 15 нафар футболчига чиқиш эшигини кўрсатди

Лондоннинг “Челси” клуби жорий ёзги трансфер ойнаси вақтида таркибда “тозалаш ишлари”ни амалга ошириши кутилмоқда. Журналист Николо Скиранинг хабарига кўра, бу қарор клуб бош мураббийи Энцо Маресканинг ташаббуси билан қабул қилинган. У “аристократлар” раҳбариятига 15 нафар футболчининг рўйхатини берган.

Маресканинг “қора рўйхати”га қуйидаги футболчилар киритилган: Кристофер Нкунку, Аксел Дисаси, Бенуа Бадиашиле, Лесли Угочукву, Бен Чилуэл, Раҳим Стерлинг, Алфи Гилкрист, Карни Чуквуэмека, Кирнан Дюсбери-Ҳолл, Николас Жексон, Марк Гиу, Ренату Вейга, Аарон Анселмино, Армандо Броя ва Давид Датро Фофана. Клуб бу футболчилар бўйича тушадиган таклифларни кўриб чиқишга тайёр. Улар тўлиқ трансфер ёки ижара асосида жамоадан кетиши мумкин.

Мураббий бу қарор орқали бир неча мақсадни кўзламоқда: таркибни оптималлаштириш, молиявий фейр-плей қоидаларига қатъий амал қилиш ва ўз футбол фалсафасига мос ўйинчилар ишлаш.

Маълумот учун, “Челси” янги мавсумдаги илк учрашувини 17 август куни ўз майдонида “Кристал Пэлас”га қарши ўтказади.

Эслатиб ўтамиз, “аристократлар” ўтган мавсумда Англия Премер Лигасида 4-ўринни эгаллаб, 2025/26 йилги Европа Чемпионлар Лигаси йўлланмасини қўлга киритган. Бундан ташқари, клуб янги форматда ўтказилган Клублар ўртасидаги Жаҳон чемпионатида ғолибликни қўлга киритди.