Англиянинг “Манчестер Юнайтед” ва “Вест Ҳэм” клублари ўртасида бўлиб ўтган ўртоқлик учрашуви рекорд даражадаги томошабинлар сони билан тарихда қолди. ESPN нашрининг хабар беришича, Нью-Йорк яқинидаги Ист-Разерфорд шаҳрида жойлашган “MetLife” стадионидаги ўйинни 82 566 нафар мухлис бевосита стадиондан томоша қилган.
Бу кўрсаткич 2025 йил бошидан бери қайд этилган энг юқори натижа бўлиб, аввалги рекордни ортда қолдирди. Хусусан, Клублар ўртасидаги Жаҳон чемпионати финали доирасидаги “ПСЖ” ва “Челси” жамоалари ўртасидаги баҳсни 81 118 нафар томошабин кузатган эди.
Рекорд даражадаги аудиторияни жалб этишда чипта нархининг нисбатан арзонлиги муҳим омил бўлди. Англия Премьер Лигаси клублари ўртасидаги бу баҳсга кириш нархи 77 доллардан бошланганди. Клублар ўртасидаги Жаҳон чемпионати финалида эса чипталар камида 200 доллардан сотувга чиқарилган эди.
Маълумот учун, “Манчестер Юнайтед” – “Вест Ҳэм” ўйинида ҳисоб 2:1 бўлиб, “қизил иблислар” ғалаба қозонди. Жамоа ярим ҳимоячиси Бруну Фернандеш дубль муаллифига айланган бўлса, “Вест Ҳэм”нинг ягона голини Жаррод Боуэн киритди.
Изоҳ (0)