Туркиянинг мудофаа ва технология соҳасидаги энг юқори мартабали амалдорлари мамлакат 2 минг км масофага учиб бора оладиган ракета дастури устида ишлаётганини расман маълум қилди. Мазкур қадам Анқаранинг минтақавий ҳарбий куч сифатидаги мавқеини мустаҳкамлаш йўлида янги босқич ҳисобланади.
“Биз Туркиянинг 2 минг км ракета дастури борлигини расман эълон қилдик. Энг илғор технологияларга миллий даражада эришдик. Туркия ўйин қоидаларини ўзгартирадиган пайт келди”, деган Саноат ва технологиялар вазири Меҳмет Фатиҳ Качир.
Унинг сўзларига кўра, Туркия ракетасозлик технологиялари борасида анча илдамлаб, мазкур тармоқни жуда юқори даражада ривожлантирган. Унинг ушбу баёнотдан олдин президент Ражаб Тоййиб Эрдўғон ҳам ракета ишлаб чиқариш салоҳиятини ривожлантириш режалари борлигини тасдиқлаган эди.
“Яқин орада ҳеч ким қарши чиқишга журъат қилмайдиган мудофаа қувватига эга бўламиз”, деган эди у июндаги нутқида.
Стратегик мақсад
Турклар эълон қилган 2 минг км жанговар радиусга эга ракета лойиҳаси назарий жиҳатдан мамлакатга Марказий Европа, Шимолий Африка ва Яқин Шарқнинг катта қисмини нишонга олиш имконини беради. Ҳозирча техник тафсилотлар ошкор этилмаган. Бироқ экспертлар мазкур тизим Som ва Tayfun дастурлари асосида ишлаб чиқилишини тахмин қилмоқда.
Истанбулда бошланган IDEF-2025 форумида мамлакат ўзининг илк гипертовушли ракетасини намойиш қилди. Унинг номи Tayfun Block-4 бўлиб, вазни 7,2 тоннани ташкил этади. Ракета 800-1000 км жанговар радиусга эгалиги тахмин қилинмоқда.
Сўнгги йилларда Туркия миллий мудофаа саноатида сезилар ютуқларга эришди. Мамлакатнинг Roketsan, ТAI ва Aselsan каби компаниялари қисқа масофали қуроллардан тортиб узоқ масофали ҳаво мудофаа тизимлари ва қанотли ракеталаргача бўлган кенг спекторлари қурол-яроғларни ишлаб чиқаришни йўлга қўйди. Baykar Makina ширкатининг Bayraktar ТB2 ва Akinci каби дронлари эса аллақачон халқаро аренада шуҳрат қозонди.
Изоҳ (0)