Жанубий кореялик машҳур режиссёр Парк Чан Ук янги триллер жанридаги фильм — “Ўзга чора йўқ” (어쩔 수 없다) билан кино оламига қайтди. “Олдбой” ва “Бирлашган хавфсизлик зонаси” каби кучли психологик картиналари билан танилган режиссёрнинг бу сафарги лойиҳаси 2025 йилги Венеция кинофестивалининг асосий танлов дастурига киритилган.
Фильм сюжети америкалик ёзувчи Дональд Уэстлейкнинг “Болта” (Тhе Ах) романига асосланган. Унда Мансу исмли эркак 25 йиллик меҳнатдан сўнг заводдан ишдан бўшатилади. Ишсиз қолган Мансу янги даромад йўлини топиш умидида кучли рақобатга дуч келади ва охир-оқибат, энг яқин рақибларини йўқ қилишга қарор қилади.
Бош ролни “Калмар ўйини” ҳамда “Ажойиб еттилик” лойиҳалари орқали машҳурликка эришган актёр Ли Бён Хон ижро этган. Шунингдек, фильмда Сон Е Жин, Парк Ҳе Сун, Ём Ҳе Ран, Ча Сенг Вон каби таниқли актёрлар ҳам иштирок этган.
“Ўзга чора йўқ” фильми Жанубий Кореянинг CJ ENM ва Moho Film студиялари томонидан суратга олинган. АҚШда фильмни экранизация қилиш ҳуқуқини NEON студияси сотиб олган, бошқа минтақаларда эса фильмни MUBI платформаси намойиш этади. Фильмнинг премера санаси, тахминан, 2025 йил сентябрь ойига мўлжалланган.
Суратга олиш ишлари 2024 йил август ойида бошланган ва 2025 йил январида якунланган. Парк Чан Ук бу фильм устида узоқ йиллар ишлаган ва уни “умри бўйи орзу қилган образи” деб атаган.
Изоҳ (0)