Англиянинг икки топ клуби — “Арсенал” ҳамда “Челси” Каталониянинг “Барселона” жамоасида тўп сураётган 21 ёшли ярим ҳимоячи Марк Касадога жиддий қизиқиш билдирмоқда. Бу ҳақда Caught Offside нашри хабар берди.
Манбага кўра, Касадо ва “Барселона” ўртасида тузилган шартномада футболчининг товон пули 100 миллион евро этиб кўрсатилган. Шунга қарамай, “кўк-анорранглилар” ёзги трансфер ойнасида молиявий барқарорликни таъминлаш мақсадида футболчини арзонроқ нархда қўйиб юборишга тайёр.
Лондоннинг “Челси” клуби Касадони жамоани тарк этиши мумкин бўлган Рамео Лавиага муносиб ўринбосар сифатида кўрмоқда. “Арсенал” эса ярим ҳимоя чизиғини кучайтириш учун футболчининг хизматларига қизиқмоқда.
Марк Касадо “Барселона” академияси тарбияланувчиси ҳисобланади. У ўтган мавсумда барча мусобақалар доирасида 36 та ўйинда майдонга тушиб, ўз ҳисобига 1 гол ва 6 голли узатма ёздириб қўйган.
Ярим ҳимоячининг “Барселона” билан шартномаси 2028 йилнинг ёзигача амал қилади. Transfermarkt портали футболчининг қийматини 30 миллион еврога баҳолаган.
Изоҳ (0)