Арканзас штати Гейтвей шаҳарчасининг собиқ полиция бошлиғи 25 май куни қамоқдан қочиб кетди. У қотиллик ва зўрлашда айбланиб, ҳибсда сақланаётганди. Бу ҳақда CNN хабар берди.
56 ёшли Грант Хардин 2017 йилдан бери қамоқда жазо ўтаётган эди. Ҳозирда штат бўйлаб уни бир нечта агентликлар, жумладан, штат полицияси ва шериф идоралари изламоқда.
У қандай қочган?
Ҳардин 25 май куни тахминан 15:40 да Шимолий Марказий бўлинма қамоқхонасидан қочиб кетган. Арканзас Жазони ижро этиш департаменти маълумотни тасдиқлаган.
Қочиш вақтида Ҳардин ҳуқуқ-тартибот идоралари формасига ўхшаш кийимда бўлган. У қандай қочиб кетгани ҳақида батафсил маълумотлар келтирилмаган. Камерадаги тасвирларга кўра, собиқ полициячи қора шим, қора футболка ва қора бейсбол кепкаси, шунингдек, ўқ ўтказмайдиган нимчада бўлган.
Ҳардин қути ва бир неча ёғоч бўлаги ортилган аравани судраб чиқиб кетган. Расмийлар у қамоқхоналарда учрайдиган хавфсиз кириш-чиқиш жойи — салли порти орқали чиқиб кетганини айтмоқда.
Собиқ полициячи Арканзасда биринчи даражали қотиллик учун 30 йил, иккита зўрлаш ҳолати бўйича ҳар бирига 25 йилдан қамоқ жазосини ўтаётган эди. Расмийлар унинг қаердалиги ҳақида маълумотга эга бўлган ҳар бир кишидан ҳуқуқ-тартибот идораларига мурожаат қилишни сўрамоқда.
Изоҳ (0)