Jazoni ijro etish tizimi uchun har yili 10-15 nafar malakali psixolog kadrlarga ehtiyoj mavjud. Bu haqda Ichki ishlar vazirligi Jazoni ijro etish departamenti Axborot xizmati “Daryo”ga maʼlum qildi.
Aytilishicha, Jazoni ijro etish departamenti penitensiar psixologiyasi (jinoyatchilarni qayta tarbiyalash psixologiyasi) bo‘yicha kadrlarni tayyorlash bo‘yicha Toshkent davlat o‘zbek tili va adabiyoti universiteti bilan hamkorlikni yo‘lga qo‘ygan.
Oliy taʼlim muassasalari bilan hamkorlik o‘rnatish hamda talabalarni tizimga qiziqtirish orqali kadrlarga bo‘lgan ehtiyojni qondirish mumkin. Chunki talabalar penitensiar tizim haqida tushunchaga ega bo‘lishmasa, bu kelgusida ularni ishga qabul qilganda kasbga moslashishda qiyinchilik tug‘dirishi mumkin, deyiladi Jazoni ijro etish departamenti axborotida.
Departament masʼulining tushuntirishicha, mahkumlik davri inson uchun jismoniy hamda ruhiy jihatdan og‘ir vaqt bo‘lib, ular depressiya, yolg‘izlik, stress va boshqa ruhiy muammolarga duch kelishi mumkin.
Mahkumlar ozodlikka chiqqanidan keyin jamiyatga moslashishi kerak. Psixologik ko‘mak ularga bu jarayonda yordam beradi. Shuningdek, mahkumlarga o‘z xatti-harakatlarini tahlil qilishga va kelajakda to‘g‘ri qarorlar qabul qilishga yordam beradi.
Mahkumlar o‘z muammolarini hal qilishning konstruktiv usullarini o‘rganishi mumkin, bu esa ularning qayta jinoyat sodir etish ehtimolini kamaytiradi, deydi mutaxassis.
Maʼlumot uchun, penitensiar psixologiya (tuzatish psixologiyasi, axloq tuzatish mehnat psixologiyasi) mahkumlarni qayta ijtimoiylashtirishning psixologik asoslarini o‘rganadi: ularning buzilgan ijtimoiy shaxsiy fazilatlarini tiklash, jazoni o‘tash jarayonida ularning shaxsiyatlari dinamikasi (yaʼni muddatni o‘tash). Mahkumlar ijtimoiylashuv jarayonida o‘z qadriyatlarini qayta ko‘rib chiqishi, ular uchun ijobiy maqsadlar qo‘yishni o‘rganishi va ijtimoiy ijobiy xulq-atvor ko‘nikmalarini rivojlantirishi mumkin.
Izoh (0)