АҚШ президенти Дональд Трамп 2 июль куни Қўшма Штатлар Вьетнам билан савдо келишувига эришганини маълум қилди. Бу ҳақда CNN хабар берди.
Икки мамлакат ўртасидаги бу битим 9 июлда имзоланиши режалаштирилганди.
“Мен ҳозиргина Вьетнам билан савдо битимини имзоладим”, деб ёзган Трамп Truth Socialъда.
Вьетнам АҚШга экспорт қилинадиган барча маҳсулотларга 20 фоиз бож тўлайди. Агар маҳсулотлар бошқа мамлакатлардан Вьетнам орқали қайта юкланиб АҚШга жўнатилса, 40 фоиз бож олинади. АҚШнинг 20 фоизлик тариф ставкаси Вьетнам ва бошқа давлатларнинг жорий минимал тариф ставкаларидан икки баравар юқоридир.
“Вьетнам бунга жавобан илгари ҳеч қачон қилмаган ишни қилади. АҚШга савдо учун ўз бозорларига тўлиқ кириш имкониятини беради. Бошқача айтганда, улар Қўшма Штатларга ўз бозорини очади. Биз ўз маҳсулотимизни Вьетнамга нол тариф бўйича сотишимиз мумкин бўлади”, дея қўшимча қилган савдо вазири.
Келишув расман тузилгани ёки Вьетнам Трамп эълон қилган шартларга рози бўлгани дарҳол маълум бўлмаган. Вьетнамнинг Vietnam News нашри мамлакат бош котиби То Лам ва Трамп 2 июль куни келишув шартларини маслаҳатлашиш учун телефон орқали суҳбатлашгани ҳақида хабар берган.
“Лам АҚШ тез орада Вьетнамни бозор иқтисодиёти сифатида тан олишни ва айрим юқори технологияли маҳсулотлар экспортига қўйилган чекловларни олиб ташлашни маълум қилган”, дейилади нашр хабарида.
Оқ уй ҳозирча Трамп эълон қилган битим тафсилотлари ҳақида бирор хабар эълон қилгани йўқ. АҚШ 2024 йили Вьетнамдан 137 миллиард долларлик маҳсулот импорт қилган. Бу 5 йил олдин АҚШга экспорт қилинган товарлар қийматидан икки баравар кўп.
Изоҳ (0)