Тонгги кайфият бутун куннинг қандай ўтишини белгилайди. Баъзи машҳурлар кунни одатдагидан анча ноодатий тарзда бошлайди. Уларнинг айрим одатлари бошқаларга ҳам фойдали бўлиши мумкин.
Марк Уолберг: соат 2да туради ва музли ваннага тушади
Голливуд юлдузи Марк Уолберг жисмонан соғлом кўриниши ва қатъий кун тартибига амал қилиши билан билан ҳам машҳур. 54 ёшли актёр ҳар куни соат 2:00 да уйғонади.
Унинг эрталабки режаси ибодат, нонушта ва интенсив спорт машқларидан бошланади. Кейин душ қабул қилади ва голф ўйнайди. Кўпинча ижтимоий тармоқларда муз солинган ваннасини кўрсатади: “Кунни шундай бошлаш энг зўри”, дейди у.
Бу жадвал кўпчиликка ғалати туюлиши мумкин, лекин Марк эрта туриш учун эрта ухлаш кераклигини таъкидлайди. Одатда у кечки соат 7:00 да ухлайди. Ҳар ким бундай жадвалга амал қила олмайди, лекин етарли уйқу (7–8 соат) кун давомида Уолбергга тетиклик беради.
Миранда Керр: медитация ва селдерей шарбати
Австралиялик модел ва тадбиркор Миранда Керр ҳар тонг соат 5:30 атрофида уйғонади. Болалари уйғонмагунча ўзига вақт ажратади. Кунини медитациядан бошлайди: бу унга фикрини жамлашга ва ҳар бир лаҳзани қадрлашга ёрдам беради.
У деразани очиб, қуёш чиқишини кузатади ва об-ҳаво қандай бўлишидан қатъи назар табиатга миннатдорчилик билдиради. Сўнгра қуруқ чўтка билан терини массаж қилиш, душ қабул қилиш ва бир литр селдерей шарбати ичиш билан кунини давом эттиради.
Шифокорлар огоҳлантиради: бу шарбат ҳамма учун ҳам тўғри келмаслиги мумкин. Айниқса буйрак муаммоси борларга тавсия этилмайди. Медитация эса, аксинча, кўпчилик учун фойдали: эрталабки хотиржамлик кун давомида тинч кайфиятни беради.
Гвинет Пелтроу: аюрведа, китоб ва сауна
Актриса Гвинет Пелтроу табиий гўзаллик бўйича маслаҳатлари ва кундалик ҳаёт тарзини қандай кечириши ҳақида ижтимоий тармоқларда бўлишади. У тонгда оғзини кокос ёғи, ялпиз ва ўтлардан тайёрланган аралашма билан чаяди (5–10 дақиқа).
Сўнг аюрведа услубидаги медитация ва машқлар билан шуғулланади, мутолаа қилади. Гвинет одатда рақс элементлари билан жисмоний фаолликни танлайди, бу унинг кайфиятини кўтаради.
Пелтроу ҳам тонгда селдерей шарбатини ичади ва саунадан фойдаланади. Унинг айтишича, иссиқ буғ мушакларни бўшаштиради ва кунни тетик бошлашга ёрдам беради.
Изоҳ (0)