Осиё давлатларининг асосий таомларидан бири бўлган гуруч етиштиришнинг пасайиши Японияда унинг нархи кескин ошишига олиб келди. Бу ҳақда Anadolu хабар берди.
Нарх ошиши сабабли мамлакатда истеъмолчилар ва сиёсатчиларга босим ортмоқда. Май ойида 5 килограмм гуручнинг ўртача нархи 4000 япон иенасини (28 доллар) ташкил этган. Бу ўтган йилги нархга нисбатан 98 фоизга қиммат. Бозорларда гуруч навлари камайиб кетаётгани айтилмоқда. Глобал беқарорлик, иқлим инқирози ва маҳсулот етиштиришнинг камайиши гуруч бозорига таъсир ўтказмоқда.
Япониянинг анъанавий ошхонасида гуруч катта аҳамиятга эга. Аммо унинг етиштирилишига сўнгги иқлим ҳодисалари ва табиий офатлар таъсир кўрсатган. Ҳосилдорликнинг пастлиги ва мамлакатда туризм соҳасининг гуллаб-яшнаши гуруч нархини белгилашда аҳамиятга эга.
Гуруч нархининг ошиши инфляцияни ҳам кучайтириб юборган. Мамлакат йиллар давомида биринчи марта Жанубий Кореядан гуруч импорт қилишга мажбур бўлган. Япония анчадан буён дезинфляция билан курашиб келмоқда. Май ойида мамлакатда инфляция даражаси 3,6 фоизни ташкил этган. Бу Япония банкининг 2 фоизлик мақсадли кўрсаткичидан анча юқори ҳисобланади.
Гуруч нархи Россия-Украина уруши бошланганидан кейин буғдой нархи билан бирга кўтарила бошлаган. Бу эса етказиб бериш танқислигини келтириб чиқарган. Шу билан бирга, 2023 йилнинг рекорд даражадаги иссиқ ёзи ҳосилга зарар етказган. 2024 йилнинг август ойидаги катта зилзила хавфи гуруч сотиб олиш ва захира сақлаб қўйишни кескин ошириб юборган. Оқибатда яна бир тақчиллик юзага келган. Пандемиядан кейин сайёҳлар ва маҳаллий аҳолининг гуруч истеъмол қилиши ортган.
10 июнь куни Япония қишлоқ, ўрмон ва балиқ хўжалиги вазири Шинжиро Коизуми ошган нархларни барқарорлаштириш учун 910 минг тонналик захирадан қўшимча 200 минг тонна гуруч, 2020 ва 2021 йилги ҳосилдан эса икки партияда 100 минг тонна гуруч берилиши ҳақида маълум қилганди. Вазирга кўра, 5 килограмм гуручнинг нархи тахминан 2 минг япон иенаси (14 доллар) бўлиши керак эди. Ҳукумат гуручни кимошди савдоси орқали улгуржи сотувчиларга сотмасликка қарор қилган.
Гуруч импорти АҚШ-Япония савдосида муҳим аҳамиятга эга. Агар ҳозирги музокаралар муваффақиятсизликка учраса, мамлакат 24 фоиздан юқори божларга дуч келиши мумкинлиги айтилган. Вашингтон эса Японияни АҚШ қишлоқ хўжалиги маҳсулотларини, жумладан, гуручни кўпроқ импорт қилишга ундамоқда. Мамлакат ҳозирги кунда 770 минг тонна гуручнинг ярмини АҚШдан импорт қилади.
Изоҳ (0)