“Эй, синфдош”, “Хайр, мактабим”. Мактаб хотираларини ёдга солувчи энг яхши 10 та қўшиқ (видео)
25 май куни Ўзбекистондаги барча мактабларда сўнгги қўнғироқ жаранг сочди. Шу муносабат билан беғубор мактаб дамларини ёдга солувчи қўшиқлар ҳақида сўз юритмоқчимиз.
“Хайр, мактабим”
2000 йили “Tarona Records” студиясининг асосчиси Равшан Йўлдошев бастакор Ҳусан Содиқовга мактаб битирувчиларига бағишлаб қўшиқ яратиш таклифини беради. Хонанда Равшан Собировнинг амакиси Ҳусан Содиқов ўша пайтда жияни билан бирга республика бўйлаб ўтказилаётган гастрол сафарлари билан банд эди. У ижодий сафар чоғида қўшиқнинг илк вариантини яратади. Уни яратишда Равшан Собировнинг сафардаги созандаси Одилжон Маҳмудов синтезаторда дастлабки мусиқий безакни чалиб берган. Ҳусан Содиқов мусиқа профессионал бўлиши учун уни “Болалар” гуруҳи мусиқий безакчиси Вагиф Зокировга юборган. У қисқа вақтда гитара соласини қўшиб, Ҳусан Содиқовга тайёр мусиқани кўрсатган. Қўшиқ ва клип илк марта 2000 йилнинг 25 май куни омма эътиборига ҳавола этилган.
“Эй синфдош”
Бундан роппа-роса 32 йил аввал “Эй синфдош” таронасини андижонлик битирувчи йигит устозлари ва синфдош дўстларига бағишлаб ижро этган. Қўшиқнинг сўзи ва мусиқаси ҳам ижрочининг ўзига тегишли. Кейинчалик у Жаноб Мирзо тахаллуси билан ижод қилган. Аммо “Эй синфдош” қўшиғини Жаноб Мирзодан сўнг кўплаб ижодкорлар ҳам қайта куйлаган.
“Сўнгги қўнғироқ”
Сирдарёлик хонанда Асатилло Холиқов 1998 йили “Сўнгги қўнғироқ” номли қўшиқни ижро этган. У пайтларда ижтимоий тармоқлар ривожланмаган бўлса-да, қўшиқ қисқа вақтда омма эътиборига тушган. Хонанда мазкур қўшиқнинг шеърини навоийлик шоир Мурод Менглибоевнинг китобидан олган. Сўнг бастакор Алишер Икромовга мусиқа басталатган. Қўшиқ ўша йили ўтказилган “Ўзбекистон — ватаним мани” қўшиқлар танловида ғолиб бўлган.
Қуйида санъат ихлосмандлари томонидан яхши қарши олинган мактаб ва синфдошлар мавзусидаги бошқа қўшиқлар ҳам келтирилади.
Хуршид Расулов “Синфдош”
Лола — “Мактаб”
Шуҳрат Дарё — “Синфдош қиз”
Жаҳонгир Отажонов — “Синфдош қиз”
Ҳамдам Собиров — “Мактабимда”
Отабек Муталхўжаев — “Хайр, мактабим”
Нилуфар Усмонова — “Мактаб”
