Хуршид Расулов — ўзбек санъатида ўз ўрни ва йўналишига эга ижодкор ҳисобланади. Санъаткор 30 йиллик фаолияти давомида фақат жонли ижрода куйлаши билан халқ эътиборига тушган. “Дарё” Хуршид расуловнинг янги концерт дастуридан репортаж тайёрлади.
Хонанданинг уч кунлик концерти ҳам тўлиқ жонли ижрода ўтказилди. Дастурда мухлисларга манзур қўшиқлар билан бирга янги тароналар ҳам куйланди.
Фото: “Дарё”
— Концертга йиллаб тайёргарлик кўриш мумкин. Репитиция жараёнлари икки ой давомида ўтказилади. Жонли ижрода концерт бериш учун бир-икки йил тайёргарлик кўриши керак. Ўшандагина концерт кўнгилдагидек бўлади, — дейди хонанда.
Фото: “Дарё”
Шоу-бизнес вакилларининг кўпчилиги жонли ижрода концерт бериш учун овоз камида уч кун дам олиши керак, деб ҳисоблашади. Хуршид Расулов бу гаплар шунчаки баҳоналиги, шамоллаган пайтда ҳам жонли куйлашга мажбур бўлгани ҳақида гапирди.
Фото: “Дарё”
— Менимча, бу гаплар шунчаки баҳона. Концерт куни ҳам овозимда озгина шамоллаш бор. Лекин барибир ишлашга мажбурман. Чунки шунча мухлис тўпланган, уларни баҳона билан ранжитиб қўёлмайман. Жонли ижродаги концерт беришнинг замирида катта меҳнат ётади. Буни “катта” санъаткорлар жуда яхши билишади. Икки-уч ой овоз устида тинимсиз ишланса, жонли ижрода концерт берса бўлади. Муҳими меҳнатдан қочмаслик керак, — дейди хонанда.
Фото: “Дарё”
Жонли ижрода куйлайдиган хонандада овозидаги муаммолар сабаб тўй-хизматларини рад этган пайтлари бўлганми? Бу саволга Хуршид Расулов қуйидагича жавоб берди.
Фото: “Дарё”
— Ундай вазиятлар бўлмаган. Овозим бўғилган пайтлар ҳам бор. Лекин хизматни ўтказишга ҳаракат қиламан. Чунки ўша инсон яхши кунида бирга бўлишимизни ният қилган бўлади. Унинг қувончини бузишга ҳаддим сиғмайди, — дейди хонанда.
Фото: “Дарё”
Хуршид Расулов ўғлидан бошқа хонандалар билан дуэт куйламаслигининг сабабини қуйидагича изоҳлади.
Фото: “Дарё”
— Ўғлим билан ҳам дуэт куйлаганим йўқ. Баъзида саҳнада кўмаклашиш учунгина мен билан бирга чиқади. Дуэт куйлаш кўнгил билан боғлиқ ҳолат. Агар икки хонанданинг кўнгли бир-бирига яқин бўлмаса бирга куйлолмайди. Мен истаган хонанда мен билан дуэт куйлашни истамаслиги мумкин. Дуэт айтишни хоҳлаганларни ҳам рад этган пайтларим кўп бўлган, — дейди хонанда.
Концертда қизиқчи Аваз Охун ҳам иштирок этди.
Фото: “Дарё”
— Хонанданинг ижодидан келиб чиққан ҳолда рэпертуар танлашга ҳаракат қилдим. Хуршид Расуловнинг ижодини анча йилдан бери кузатаман. Айни севдим-куйдим мавзудаги қўшиқлари оммалашган пайтида биз ҳам шундай туйғуларни бошдан кечираётгандик, — дейди сўз устаси.
Бундан ташқари, Аваз Охун бу йил ўнинчи яккахон концерт дастурига тайёргарлик кўраётганини ҳам маълум қилди.
Дастурга Феруза Бону бошловчилик қилди.
Фото: “Дарё”
— Кўпчилик мухлислар қатори Хуршид Расуловнинг “Ёшлик бизни ташлаб кетади” қўшиғини севиб тинглайман. Бу инсонни нафақат ижодкор, балки яхши инсон бўлгани учун ҳам ҳурмат қиламан. Қўшиқларида ўзига хос шижоат ва мардлик бор, — дейди Феруза Бону.
Концертга нафақат ўзбекистонлик, балки қўшни республикаларда яшовчи мухлислар ҳам ташриф буюришган. Улар орасида 20 йилдан буён хонанданинг ижодини кузатадиганлари ҳам бор.
Изоҳ (0)