Jinoyat ishlari bo‘yicha Mirzo Ulug‘bek tumani sudida 15-may kuni Ozoda Nursaidova qo‘shig‘iga klip suratga olinayotganda sodir bo‘lgan mudhish avtohalokatning sud jarayonlari boshlandi.
Sud yopiq tarzda bo‘lib o‘tdi, chunki jabrlanuvchini mashinada bosib ketgan qiz voyaga yetmagan va u bor-yo‘g‘i 16 yoshda.
Shunga qaramay, Milliy telekanalining “Millar” ko‘rsatuvi ijodkorlari sudda qatnashib Sabrina va uning advokati bilan suhbatlashdi.
“To‘liq tuzalganim yo‘q, hali oldinda 6 oydan 1 yilgacha davom etadigan reabilitatsiya muolajalari turibdi, ichimda esa 1 kilogrammdan ortiq temir bor. Yurganim bilan kelajakda turmushga chiqa olmayman, farzand ko‘ra olmayman”, deydi Sabrina Jabborova.
Bir necha oy avval Instagramʼda Shahzoda Muhammedovaning turmush o‘rtog‘i Marat Hamdamov o‘zi qurayotgan uylardan Sabrina Jabborovaga ikki xonali kvartira bergani haqida gap-so‘zlar tarqalgan edi. Sabrinaning aytishicha, unga hali uy berilgani yo‘q.
“Mendan, ularga pasportimning nusxasini yuborib qo‘yishimni so‘rashdi, yubordim, 1 haftadan oshdi, hech qanday javob yo‘q. Bu qanchalik to‘gri yoki noto‘g‘riligini bilmadim, lekin menga hali uy berilgani yo‘q”, deydi Sabrina.
“Internetdagi hamma gaplarga ham ishonib bo‘lmaydi, Marat Xayrullayevichga Sabrinaning telefonidan bog‘lanmoqchi bo‘ldik, afsuski, uni qora ro‘yxatga kirgizib qo‘yishibdi, natijada ulana olmadik. Bu Marat Xayrullayevich shunchaki internetda mashhurlikka erishish uchun qilingan piar hisoblanadi”, deya qo‘shimcha qildi Sabrinaning advokati Zeboxon Komilova.
Izoh (0)