Францияда қуёш панеллари ўрнатилган йўл лойиҳаси ўзини оқламагани сабаб ёпиладиган бўлди

Франция шимолида қурилган қуёш батареяли йўл лойиҳаси етарлича электр энергиясини етказиб бера олмагани учун ёпиладиган бўлди, деб хабар беради «Korrespondent.net».

2016 йил декабрида Colas компанияси Wattway — фотогалваник панеллардан ташкил топган биринчи автомобиль йўлини қурган эди.

Узунлиги 1,6 километр бўлган трасса Франция шимолида жойлашган. Муҳандислар ҳисоб-китоби бўйича йўл йилига 150 минг кВт соат электр ишлаб чиқариши ва Турвур шаҳридаги йўл ёритгичларини электр энергияси билан таъминлаши лозим эди.

Лойиҳа қиймати 5,2 миллион долларга тенг бўлиб, у Франция ҳукумати томонидан молиялаштирилганди. Аммо Wattway бир нечта хато сабабли муваффақиятсизликка учради.

Масалан, компания иқлимни ҳисобга олмаган: Канда йилига атиги 44 кун қуёшли бўлади. Бунинг устига, Colas кузда йўлни қалин хазон қоплашини кўзда тутмаган.

Бундан ташқари, муҳандислар йўлга тушадиган босимни ҳам нотўғри ҳисоблашган – панеллар полимер қоплама билан қопланган бўлса-да, вақт ўтгач оғир автомобиллар ва маҳаллий фермерлар тракторлари панеллар синдира бошлади.

Оқибатда 2018 йил майда йўлнинг 90 метри мутлақо яроқсиз ҳолга келиб қолган. Йўл эса бир йилда атиги 80 минг кВт соат электр ишлаб чиқарди.