Ҳарбий мактабни тугатган бўлса-да, актрисаликни танлаган Болливуд юлдузи — Аннушка Шарма 37 ёшда

Машҳур актриса Анушка Шарма 2000 йилларнинг ўрталаридан сўнг Болливудга кириб келди — ҳозирда у энг юқори маош оладиган ҳинд актрисалари сафида турибди. Актрисаликдан ташқари, у хайрия ишлари билан шуғулланиб, жинслар тенглиги ва ҳайвонлар ҳуқуқлари учун курашмоқда.

Болалик ва ўсмирлик даври

Бўлажак актриса 1988 йил 1 майда Ҳиндистоннинг Уттар-Прадеш штатидаги Аёдҳя шаҳрида дунёга келган. Қизнинг онаси уй бекаси бўлган, отаси Ажай Кумар Шарма эса армияда зобит унвонида хизмат қилган. Анушканинг катта акаси Карнеш кино продюсери сифатида фаолият юритади.

Қиз отасининг талаб қилиши билан ҳарбий мактабни тугатиб, Бангалордаги Mount Cаrmel гуманитар коллежига ўқишга кирган. Коллежда таҳсил олиш даврида у модалар намойишларида қатнашган ва машҳур журналлар учун суратга тушган.

Анушка Шарма иштирок этган фильмлар

Шарманинг кинематографик фаолияти 2008 йилда бошланган. Актрисага “Тангри яратган жуфтлик” фильмида Таани Саҳни ролини ижро этиш имконияти берилган. Анушка билан бирга фильмда Шоҳрух Хон, Винай Патхак ва Рани Мукержи ҳам суратга тушган. Интервьюларининг бирида актриса бу ролни унга Худонинг ўзи юборган деб таъкидлаган. Шунингдек, у “Энг яхши аёл дебюти” номинациясида нуфузли Filmfare мукофотига номзод бўлган.

Икки йилдан сўнг катта экранларга актриса иштирокидаги 2 та премера — “Тўй маросими” ва “Ярамаслар тўдаси” бир вақтнинг ўзида чиқди. “Ярамаслар тўдаси” фильми режиссёри Пармит Сетхи унинг сценарийсини диалоглар билан бирга атиги 6 кунда ёзиб тугатган.

“Токи тирик эканман” драмаси Шармага Filmfare мукофотининг “Энг яхши иккинчи даражали аёл роли” номинациясида ғалаба келтирди. Анушка Дисcоверй каналининг журналисти Акира Рай образини яратди. Фильм жаҳон кинотеатрларида шунчалик муваффақиятли бўлдики, Болливуд фильмлари орасида чет элдаги даромадлар бўйича 3-ўринни эгаллади.

Шундан сўнг “ПК” фильми 2014 йилнинг энг кўп даромад келтирган ҳинд премераси бўлди. Режиссёр Ражкумар Хирани бу фантастик комедияни ўзининг энг сара асари деб ҳисоблайди. Унда Анушка Шармага бош қаҳрамон Жагат (Жаггу) Жанани Саҳни ролини ижро этиш насиб этди. Молиявий муваффақиятдан ташқари, муаллифлар энг яхши сценарий ва диалоглар учун 2 та Filmfare мукофотини қўлга киритган.

2020 йилда Анушка “Инглиз мактаби” фильмида эпизодик рол ижро этди, Шарманинг ҳамкасби Ирфон Хон эса бош ролни ўйнади. Айтганча, Хонга энг яхши актёр сифатида Filmfare мукофоти топширилди. Афсуски, бу фильм унинг фаолиятидаги сўнгги иши бўлиб қолди — 2020 йил 29 апрелда у касалхонага ётқизилганидан кейин вафот этди.

Шахсий ҳаёти

Актрисанинг мухлислари орасида уларнинг севимли юлдузи пластик жарроҳлик қилдирганми ёки йўқми, деган баҳслар тўхтамаяпти. 2014 йил февралида у жарроҳлик амалиётидан ўтганлиги ҳақидаги миш-мишларни рад этди. Аммо лабларни вақтинчалик катталаштирувчи воситадангина фойдаланганини таъкидлади.

2017 йил қишда Шарма ўз севгилиси — крикет ўйинчиси Вират Кохлига турмушга чиқди. Улар тўйгача бир неча йил давомида учрашиб юрган. Интернетда жуфтликнинг гоҳ ажрашиб, гоҳ ярашгани ҳақидаги хабарлар тез-тез пайдо бўлиб турарди.

Анушка Шарма ва спортчининг тўйи Италия жанубидаги ижарага олинган мулкда ўтказилди. Меҳмонлар орасида кўплаб Болливуд юлдузлари, спортчилар ва юқори лавозимли амалдорлар бор эди. Европага кела олмаган меҳмонлар учун жуфтлик Нью Деҳлидаги меҳмонхонада алоҳида тантанали қабул маросими уюштирди.

2021 йил 11 январда актриса қизли бўлди. Бахтли ота-она тўнғич фарзандларига Вамика деб исм қўйишди. Юлдузнинг ижтимоий тармоқларидаги меросхўр билан биринчи оилавий сурати у туғилганидан бир йил ўтгач пайдо бўлди.

Анушка Шарма ҳозир

Ҳозирда Шарма фильмографиясини янги кинолар билан бойитишни давом эттирмоқда. 2022 йил декабрь ойининг охирида “Чакда Хпресс” фильмининг суратга олиш ишлари якунланди. Унда Анушкага бош қаҳрамон Жулан ролини ишониб топширишди. Драма крикет ўйинчиси Жулан Госвамининг ҳаётига асосланган. Жаҳон премераси 2023 йил декабрь ойининг ўрталарига мўлжалланган.