Андижон вилояти ҳокими Шуҳрат Абдураҳмонов шаҳар-туман ҳокимларининг инвестиция бўйича ўринбосарларининг “егани олдида, емагани ортида” эканини айтиб, ойлигини ҳалоллаб олмаётганидан нолиди. Бу ҳақда Андижон вилояти ҳокимлиги ахборот хизмати хабар бермоқда.
Маълум қилинишича, 22 апрель куни Андижон вилояти ҳокими Шуҳрат Абдураҳмонов Бобур шаҳрида тадбиркорлик фаолиятини йўлга қўймоқчи бўлган фуқаролар, турли муаммо ва қийинчиликларга учраётган тадбиркорлар билан учрашув ўтказган.
Мулоқот давомида Шуҳрат Абдураҳмонов шаҳар ва туман ҳокимларининг инвестиция бўйича ўринбосарлари фаолиятини танқид қилиб, “егани олдида, емагани ортида” бўлган мутасаддилар натижа кўрсатолмаётганидан норозилигини билдирган.
“Инвестиция бўйича ўринбосарга нима қилдинг уч йилда, деяпман. Ҳеч вақо қилмаган. Ваҳоланки, ойма-ой ойлигини оляпти. Яна айтяпман, ҳурматли президентимиз шароитини қилиб берган, уйлари, машинаси бор. Ҳамма нарса бор. Егани олдида, емагани кетида. Хоҳлаган давлатга давлат ҳисобидан бориши мумкин. Фақат натижа бўлиши керак. Қуруқ сайёҳ бўлиб бориши керак эмас у ерга”, деди Андижон вилояти ҳокими.
Ҳоким андижонлик йигитлар Хитойда туриб, инвестор юбораётганини айтаркан, шу ерда ишлаётган ўринбосарлар ҳеч нимага фойдаси тегмаётганини, ойлигини ҳалоллаб олмаётганини қайд этган.
“Мен нимага бу гапни гапиряпман, чунки Хитойда икки-учта ўн-ўн беш йиллаб юрган андижонлик ёшларни кўрганман. Улар ҳозир Хитойда менинг вакилим бўлиб юришибди.
Инвестиция бўйича ўринбосар бўлиб, бир сўмлик жамиятга, Андижонга фойдаси тегмайдиган ойлик олиб ўтирганлар бор. Бир сўмлик фойдаси йўқ. Лекин у давлатда туриб Андижон учун инвесторларни шундай жалб қилиб бераётган йигитлар бор. Қобилияти, муомала маданияти ҳам бор, тилни ҳам билади. Давлатларни ва инвесторларни жалб қилишни ҳам билади. Улар у ёқда юрибди, бу ерда эса на жамиятга, на юртга, на Андижонга, на бошқага фойдаси тегаётган лавозимда ўтиришибди. Ойлигини ҳам ҳалолламасдан”, деди ҳоким.
Таъкидланишича, Андижон вилояти ҳокими ўринбосарларга ўз ҳудуди кесимида инвесторлар ва тадбиркорларни топиш учун ўн кун муддат берган. Шунингдек, тил биладиган, дипломатиядан хабари бор йигит-қизларни ишга таклиф қилган.
“Бугун мен андижонликларга, шижоатли ёшларга, андижонлик бўлиб чет давлатларда ўқиб, ишлаб юрган фуқароларга мурожаат қилмоқчиман. Вилоятдаги барча шаҳар ва туман ҳокимларининг инвестиция бўйича ўринбосарлик лавозимига танлов эълон қиламан.
Ўқимишли, тил биладиган, дипломатиядан оз бўлсада хабари бор, инвестор жалб қилиш, инвестиция олиб киришда малакаси бўлган андижонлик йигит-қизларни ишга қабул қиламан. Марҳамат, мурожаат қилинглар, ҳамкорлик қилишга тайёрман”, деди Шуҳрат Абдураҳмонов.
Изоҳ (0)