Samsung компанияси смартфонни имо-ишоралар орқали бошқариш имконини берувчи футуристик “Shortcut Sneaker” кроссовкаларининг чекланган сонини намойиш этди. Бу ҳақда Europa Plus нашри хабар берди.
Кроссовкалар Чеил Бенелух креатив агентлиги, электроника ишлаб чиқарувчи Elitas Wearаbles ҳамда Брут Амстердам компанияси билан ҳамкорликда ишлаб чиқилган. Пойабзалнинг дизайни Роэл ван Хоффга тегишли. Маркетинг менежери Гербен ван Уолй Меер смартфонларни бошқарувчи кроссовка ҳақида шундай дейди:
“Samsung компанияси нафақат ҳаёт тарзимизни енгиллаштириш, балки уни бойитиш учун ҳам инновациялар яратади. Биз сизларга “Shortcut Sneaker” номли келажак кроссовкаларини тақдим этамиз. Пойабзал смартфонингизни ҳаракатланиш пайтида бошқариш имконини беради”.
Кроссовка тагида ҳаракат датчиклари ўрнатилган бўлиб, улар қўнғироқ қилиш ёки мусиқани ёқиш каби смартфоннинг маълум функцияларини фаоллаштиради.
Мисол учун, агар фойдаланувчи Майкл Жексоннинг “ойда юриш” рақс ҳаракатини (орқага сурилиш) амалга оширса, смартфон мусиқа ижро этади. Ёки иккита товон бир-бирига тегилса, аввалдан танлаб олинган бирор рақамга қўнғироқ қилинади.
Samsung кроссовкаларнинг ташқи кўриниши устида профессионал дизайнер ишлади. Оёқ кийимларни яратишда у космос тасвири ва Galaxy смартфон дизайнидан илҳомланган:
“Роэл ван Хофф томонидан ишлаб чиқилган дизайн келажак пойабзалига ўзига хослик беради. Мазкур кроссовка яқинларингизга қўнғироқ қилиш имконини берувчи дунёдаги биринчи пойабзалдир”, — дейди компания вакиллари.
Samsung Shortcut кроссовкасини сотувини жорий этиш истагида эмас. Жами 6 жуфт кроссовкалар жорий йилнинг 9—15 июль кунлари Samsung Меmbers иловасининг халқаро фойдаланувчилари учун танлов соврини сифатида тақдим этилади. Конкурс ғолиблари июль ойининг иккинчи ҳафтасида эълон қилинади.
Изоҳ (0)