Таъмирлаш ишлари сабаб ёпилган Урганч халқаро аэропорти режада белгиланган вақтдан аввалроқ — 5 август куни очилади. Бу ҳақда Uzbekistan Airports матбуот хизмати хабар берди.
Урганч халқаро аэропорти учиш-қўниш йўлагини капитал таъмирлаш ишлари бошлангани муносабати билан 20 июль куни ўз фаолиятини вақтинча тўхтатган эди. Режага мувофиқ таъмирлаш ишлари аэропортда 7 августга қадар амалга оширилиши кўзда тутилганди.
Қурилиш-таъмирлаш ишлари белгиланган муддатдан аввалроқ якунлангани муносабати билан ушбу аэропорт 5 август куни Тошкент вақти билан соат 11:00 да ўз фаолиятини тиклайди.
Маълум қилинишича, икки ҳафта ичида катта ҳажмдаги ишлар амалга оширилди. Жумладан, узунлиги 3000 м ва эни 45 м бўлган учиш-қўниш йўлаги қопламаси алмаштирилди ва мустаҳкамланди, иккинчи ва учинчи юриш йўлаклари капитал таъмирланди. Бу аэропортга Boeing 787 ва Airbus А330 каби кенг фюзеляжли самолётларни чекловларсиз қабул қилиш ва, ўз навбатида, Урганч шаҳрига рейслар сони ва йўловчилар оқимини кўпайтириш имконини беради.
Урганч шаҳридаги учиш-қўниш йўлагини капитал реконструкция қилиш ишлари охирги марта 1997 йилда, шикастланган қисмларини қисман таъмирлаш эса 2018 йилда амалга оширилган.
Изоҳ (0)