Ўзбекистон ҳукумати Uzbekistan Airports АЖ, Транспорт вазирлиги ҳамда Иқтисодиёт ва молия вазирлиги билан биргаликда Урганч халқаро аэропортини модернизация қилиш ва бошқариш бўйича давлат-хусусий шериклик лойиҳасини амалга оширишни режалаштирмоқда. Бу ҳақда Транспорт вазирлиги матбуот хизмати хабар берди.
Урганч халқаро аэропорти мунтазам равишда 8 та авиакомпанияга ва Евросиё бўйлаб чартер рейслари бўйича 40 га яқин авиакомпанияга хизмат кўрсатади. 2023 йилда аэропорт 590 минг йўловчига хизмат кўрсатган бўлса, 2024 йилда йўловчи ташиш ҳажми 17 фоизга ошиши кутилмоқда. Дастлабки прогнозларга кўра, ДХШ даврида йўловчи ташиш ҳажми ҳар йили ўртача 7,5 фоизга ўсиши кутилмоқда.
Ўзбекистон ҳукумати томонидан иқтисодиётнинг турли тармоқларида, жумладан, транспорт инфратузилмасида давлат сектори инвестициялари ва хизматлар кўрсатиш механизмлари самарадорлигини оширишга қаратилган ислоҳотлар дастури амалга оширилмоқда.
Ушбу дастур доирасида Ҳукумат дунё мамлакатлари билан алоқани яхшилаш, шунингдек, халқаро авиа йўналишларга кириш имкониятини ошириш, туризм, савдо ва иш ўринлари яратишни рағбатлантириш мақсадида транспорт инфратузилмасида ДХШни ривожлантириш ниятида.
UzAirports “Урганч халқаро аэропортини қуриш, ундан фойдаланиш, топшириш (BОТ) моделидан фойдаланган ҳолда модернизация ва бошқариш” лойиҳасини амалга ошириш бўйича тендернинг биринчи босқичи (талабгорларга дастлабки малака ҳужжатлари) ҳақида эълон қилди.
UzAirports компанияси PricewaterhouseCoopers (PwC) ва White&Case (W&C) компанияларини танлов савдолари орқали хусусий шерик танлашда ёрдам бериш учун ихтисослашган маслаҳатчилар сифатида жалб қилди.
Лойиҳа қуйидаги модернизация ишларини ўз ичига олади:
- 3500 м узунликдаги янги учиш-қўниш йўлагини қуриш;
- асосий бурилиш йўлагини қуриш;
- 2 босқичли бурилиш йўлакларини қуриш;
- 2 та туташувчи бурилиш йўлакларини қуриш;
- мавжуд апронни реконструкция қилиш;
- янги маъмурий терминал қуриш;
- янги юк терминалини қуриш;
- махсус жиҳозлар биносини қуриш;
- янги умумий овқатланиш мажмуасини қуриш;
- майдони 39 000 метр квадрат бўлган халқаро рейслар учун соатига 1000 йўловчига (ҳам жўнаш, ҳам қўниш) ва ички рейслар учун соатига 300 йўловчига (ҳам жўнаш, ҳам келиш) хизмат кўрсатишга мўлжалланган янги йўловчи терминалини қуриш.
Изоҳ (0)