Rossiya armiyasi navbatdagi yirik hujum amaliyotiga hozirlik ko‘rmoqda. Ehtimoliy yo‘nalishlaridan biri RF bilan chegaradosh Sumi viloyati bo‘lishi mumkin. Bu haqda The Telegraph nashri xabar berdi.
Nashr manbalariga ko‘ra, Kursk viloyatidan chekingan Ukraina qo‘shinlari Sumi yo‘nalishiga joylashtirilmoqda, bu esa Kiyev mazkur yo‘nalishdan zarba kutayotganiga dalolat qilishi mumkin. Ammo The Telegraph suhbatlashgan ekspert Rossiya armiyasining “Sumi frontini yorib kirish” ehtimolini past baholagan.
FDD (Foundation for Defense of Democracies) markazining Rossiya dasturi direktori o‘rinbosari Jon Hardiga ko‘ra, rus armiyasi ayni damda hujum amaliyotlarini cheklangan miqyosda, asosan, kichik guruhlari orqali olib borilmoqda.
“Biz ko‘rayotgan narsa — hujum tempining oshishi, ammo bu juda kichik hajmda. Ular Ukraina himoya chizig‘ida yoriq ochishi mumkin, lekin bu bilan strategik yutuqqa erisha olmaydi”, dedi Hardi.
Materialda yozilishicha, rus armiyasi hujum amaliyotlarining aksariyatini piyoda kuchlar orqali amalga oshirmoqda. Bunga sabab sifatida texnika va zirhli transport vositalarining kuchli taqchilligi ko‘rsatilgan.
Rossiyaning texnik yo‘qotishlari:
The Telegraph nashriga ko‘ra, o‘tgan bir yil ichida Rossiya
3 000 dan ortiq tank,
9 000 dan ortiq zirhli texnika,
13 000 dan ortiq artilleriya tizimlarini yo‘qotgan.
“Zaxiradagi texnikalarga qaralsa, ularning xizmatga yaroqli qismi keskin kamaygani ko‘rinadi. Yil oxiriga kelib ular qo‘shimcha kuchlarni safarbar etishda jiddiy qiyinchiliklarga duch kelishadi”, deya xulosa qilgan Hardi.
Izoh (0)