Тошкент шаҳрида 10,5 гектар ерларни ўзбошимчалик билан эгаллаб олиш бўйича ҳуқуқбузарликлар аниқланди. Бу ҳақда Кадастр агентлиги “Дарё”га хабар берди.
Маълум қилинишича, Кадастр агентлиги Тошкент шаҳар бошқармаси ходимлари томонидан 2025 йилнинг 1 март ҳолатига пойтахт ҳудудида амалга оширилган ер ва кадастр назорати тадбирлари натижасида 737 та ҳолатда 10,5 гектар ерларни ўзбошимчалик билан эгаллаб олиш бўйича ҳуқуқбузарликлар аниқланди.
Таҳлилларга кўра, энг кўп ерга оид ҳуқуқбузарлик Сергели (91 та ҳолатда 2,4 гектар), Яшнобод (83 та ҳолатда 0,6 гектар), Учтепа (75 та ҳолатда 2,6 гектар), Юнусобод (71 та ҳолатда 1,1 гектар) ва Олмазор туманлари (70 та ҳолатда 0,8 гектар) ҳиссасига тўғри келади.
Ҳуқуқбузарлар билан олиб борилган тушунтириш ишлари, берилган ёзма кўрсатмалар асосида 457 та ҳолатда 3,8 гектар ер қонунбузилиш ҳолати фуқаролар томонидан ихтиёрий равишда бартараф этилиб, ўзбошимчалик билан эгалланган ер майдони асл ҳолатига қайтарилди.
Ўзбошимчалик билан эгалланган 1,6 гектар ер майдонларида қурилган ноқонуний қурилмаларни буздириш юзасидан судларга 83 та та даъво аризалари киритилди. Ҳуқуқбузарлик ҳолатида жиноят аломатлари мавжуд бўлган 11 та иш материали ўрнатилган тартибга мувофиқ прокуратура органларига киритилди.
Ўзбекистонда 2024 йилда 66 109 та ҳолатда ерларнинг ўзбошимчалик билан эгаллаб олиниши аниқланган.
2024 йил мобайнида Кадастр агентлиги томонидан олиб бориладиган ер ва кадастр назорати йўналишида амалга оширилган тадбирлар натижасида:
- 66 109 та ҳолатда 9 462,3 гектар ерларнинг ўзбошимчалик билан эгаллаб олиш ҳолатлари аниқланиб,
- 41 972 та ҳолатда 4 472,2 гектар ерда қонунбузилиш ҳолатлари ихтиёрий равишда бартараф этилди.
Шунингдек,21 459 та ҳолатда 4 654,1 гектар ерга даъво аризалари киритилди. 5 561 та (1 144,5 гектар) даъво аризалари судлар томонидан қаноатлантирилди ва мажбурий ижрога қаратилди.
Жиноят ва маъмурий жавобгарлик:
- 2 146 та ҳолатда жиноят аломатлари бўлган материаллар прокуратура органларига юборилди.
- 41 708 та шахсга ерга оид ҳуқуқбузарликлар учун маъмурий жазо чоралари қўлланилди.
Изоҳ (0)