Шавкат Мирзиёев ва Эрон президенти Масъуд Пезешкиён 1 апрель куни телефон орқали мулоқот қилди.
Президент матбуот хизматининг хабар қилишича, мулоқотда бир-бирларини ва мамлакатларнинг дўст халқларини Наврўз ва Рамазон ҳайити билан табриклаб, тинчлик-осойишталик, фаровонлик ва равнақ тилади.
Қабул қилинган “йўл харитаси” асосида кўп қиррали Ўзбекистон—Эрон муносабатларини янада ривожлантиришнинг долзарб масалалари атрофлича кўриб чиқилди. Турли даражаларда фаол мулоқотлар ва ташрифлар давом этаётгани мамнуният билан қайд этилди.
Ўзаро савдо ва юк ташиш кўрсаткичлари, қўшма корхоналар сони ошмоқда, пойтахтлар ўртасида мунтазам тўғридан тўғри авиақатновлар амалга оширилмоқда, ишбилармонлик ва маданий-гуманитар алмашинув кенгаймоқда. Кимё ва нефть-кимё тармоқлари, тўқимачилик ва озиқ-овқат саноати, қишлоқ хўжалиги, қурилиш материаллари тармоғи ва бошқа йўналишлардаги кооперация лойиҳаларини қўллаб-қувватлаш ва жадал амалга оширишга алоҳида эътибор қаратилди.
Теҳрон шаҳрида ўтказилиши режалаштирилган ҳукуматлараро комиссия йиғилиши, бизнес форуми ва саноат кўргазмасини самарали ташкил этиш муҳимлиги таъкидланди. Ўзбекистон ва Эрон етакчилари халқаро ва минтақавий аҳамиятга молик масалалар юзасидан ҳам фикр алмашди.
Икки давлат раҳбалари 2024 йилнинг октябрида Ашхобод шаҳридаги халқаро форум доирасида учрашув ўтказганди. Унда ҳам Ўзбекистон билан Эрон ўртасидаги кўп қиррали муносабатларни ривожлантиришнинг долзарб масалалари муҳокама қилинганди.
Изоҳ (0)