“Дарё” мухбири Афғонистоннинг Мозори Шариф шаҳри аҳолиси билан Рамазон ойи қандай ўтгани борасида суҳбатлашди.
Муборак рамазон ойида кўплаб афғонистонликлар қашшоқлик ва ишсизликдан азият чекмоқда, мамлакатдаги ёмон иқтисодий, ижтимоий ва сиёсий вазият туфайли улар кундалик таомларини тайёрлай олмаяпти.
Балх вилоятида яшовчи Қурбоншоҳнинг айтишича, у 12 йилдан бери Мозори Шарифда истиқомат қилади, оиласида 7 киши бўлиб, унга моддий ёрдам берадиган ҳеч ким йўқ.
Қурбоншоҳ “Дарё” мухбири билан суҳбатда фарзандлари ва оиласини боқишга қурби етмаслигини айтди.
Унинг сўзларига кўра, у кўп вақтини қўни-қўшниларидан ифторлик қилиш учун бирор нарса юборишларини кутиш билан ўтказади.
“Саҳарлик пайтида ҳеч нарса пишира олмагани учун гоҳ қуруқ нон билан, гоҳида саҳарлик қилмай рўза тутамиз”, дейди у.
Мозори Шариф шаҳрида яшовчи 12 ёшли Нақибулла “Дарё” мухбири билан суҳбатда отасини урушларда йўқотгани, шу сабабли иқтисодий муаммоларга дуч келганини маълум қилган. “Ифторда ҳам, саҳарликда ҳам овқатимиз йўқ”, деди Нақибулла.
“Рўза тутишга одатланиб қолганмиз, чунки Рамазон ойи бўлмаса ҳам, кўп кечаю кундуз оч қоламиз, оч ухлаймиз”, дея қўшимча қилган болакай.
Мунис исмли яна бир эркак ифтор пайти турли таомлар пишириб, юртдошларига ёрдам беришини маълум қилди.
“Менинг исмим Мунис, мен Мозори Шариф шаҳридаман. Ифтор вақтида мен сомса, перашка ва нон пишираман. Бу таомларни юртдошларимиз ифторлик қилишлари учун тайёрлаймиз”.
Изоҳ (0)