Жаҳон банки ҳавонинг ифлосланиши йилига тахминан 5,7 миллион кишининг бевақт ўлимига сабаб бўлаётганини маълум қилди. Ушбу ўлимларнинг 95 фоизи паст ва ўрта даромадли мамлакатларда кузатилади.
Ҳисоботда қайд этилишича, агар қатъий чоралар кўрилса, бу кўрсаткичларни сезиларли даражада камайтириш мумкин. Жаҳон банки экспертлари ҳаво ифлосланишининг глобал иқтисодиётга етказаётган зарари жаҳон ялпи ички маҳсулотининг қарийб 5 фоизини ташкил этишини айтди. Бу зарар соғлиқнинг ёмонлашуви, меҳнат унумдорлигининг пасайиши ва умр кўриш давомийлигининг қисқариши билан боғлиқ.
Жаҳон банкининг атроф-муҳит бўйича глобал директори вазифасини бажарувчи Женевева Коннорснинг сўзларига кўра, жуда кўп одамлар, айниқса, паст ва ўрта даромадли мамлакатларда яшовчилар ифлосланган ҳаводан нафас олади.
Шошилинч чоралар кўриш зарур, ва бизнинг янги ҳисоботимиз бу борада имкониятлар мавжудлигини кўрсатади, деди у.
Коннорс ҳисобот учта асосий жиҳатга: бошқарувни яхшилаш, маълумотлар сифатини ошириш ва давлат инвестицияларидан ташқари хусусий инвестицияларни жалб қилишга эътибор қаратишини айтди.
Ҳам мамлакатлар ичида, ҳам улар ўртасида ҳамкорликни кенгайтириш муҳим, дея қўшимча қилди у.
Сиёсатдаги ўзгаришлар одамларни юқори даражадаги ПМ2.5 заррачаларининг салбий таъсиридан ҳимоя қилишга ёрдам бериши мумкинлиги таъкидланади. ПМ2.5 — бу ўлчами 2,5 микрометр ва ундан кичик бўлган майда заррачалардир.
Глобал миқёсда ҳавони ифлослантирувчи асосий манбалар инсон фаолияти билан боғлиқ. Қишлоқ хўжалиги, шаҳарсозлик, транспорт, саноат, шунингдек, маиший овқат тайёрлаш ва иситиш каби соҳаларда амалга ошириладиган сиёсий ўзгаришлар ҳаводаги зарарли заррачалар концентрациясини камайтиришга ёрдам бериши мумкин. Баъзи ҳудудларда эса майда заррачаларнинг муҳим манбаи чўл чанглари ҳисобланади.
Изоҳ (0)