Қўқон шаҳрида Жанубий Корея компанияси томонидан Hanshin Park City шаҳарчаси бунёд этилади. Шаҳарчадан 127 та кўп қаватли уй, таунхауслар, парк, мактаб, болалар боғчаси ва бошқа зарур ижтимоий объектлар ўрин олади, деб хабар бермоқда «Дарё» мухбири Азизжон Эрматов.
Қайд этилишича, Фарғона вилояти ҳокими Хайрулло Бозоров Жанубий Кореянинг Hanshin Engineering & Construction компанияси бошқаруви раиси Чхве Ён Сон бошчилигидаги делегация вакиллари билан учрашган. Учрашувда Корея компанияси томонидан Қўқон шаҳрида Hanshin Park City шаҳарчасини барпо этиш лойиҳаси муҳокама қилинган.
Фарғона вилояти делегациясининг жорий йил март ойида Жанубий Кореяга амалий ташрифи доирасида Қўқон шаҳрида Hanshin Park City шаҳарчасини барпо этиш бўйича қиймати 250 миллион долларлик инвестицион келишув имзоланган эди.
Келишувга кўра, Жанубий Корея компанияси Қўқон шаҳрида 9, 12 ва 16 қаватли 5 минг 122 хонадондан иборат Hanshin Park City шаҳарчасини барпо этади.
Кўп қаватли уйларнинг ертўла қисмида беш мингдан зиёд автомобиль учун ерости автотураргоҳи ўрин олади. Уч йиллик режа асосида амалга ошириладиган лойиҳанинг илк босқичида 206 та хонадондан иборат олтита тўққиз қаватли турар жой биноси қад ростлайди.
Изоҳ (0)