Жанубий Кореяда амалий ташриф билан бўлиб турган Тошкент вилояти ҳокими Зоир Мирзаев бошчилигидаги делегация Сеул ва Инчон шаҳарларида Жанубий Корея ва Бирлашган Араб Амирликларининг йирик компаниялари вакиллари билан учрашди, дея хабар бермоқда «Дунё» ахборот агентлиги.
Хусусан, мамлакатдаги етакчи қурилиш компанияларидан бири ҳисобланган Hanshin Engineering & Construction ижрочи директори Чои Мун Гю билан мулоқот чоғида «Нурафшон бизнес сити» ҳудудида кўп қаватли уйлар, меҳмонхона ва тижорат бинолари қуриш ҳамда замонавий талабларга жавоб берадиган «Ақлли тиббиёт шаҳри кластери» лойиҳаси юзасидан фикр алмашилган.
Учрашув якунида Жанубий Корея ва БАА компаниялари билан Тошкент вилояти ҳудудида «Tashkent Medical Smart» ташкил этиш бўйича меморандум имзоланган. Лойиҳанинг қиймати қарийб 2 миллард долларини ташкил қилади.
Маълумот учун, мазкур компания 1950 йилда уй-жой қурилиши компанияси сифатида ташкил этилган бўлиб, кейинчалик архитектура, қурилиш, электр энергияси ва экинларни етиштириш билан шуғулланиб келмоқда.
Шунингдек, Жанубий Корея ва БААнинг тиббиёт, соғлиқни сақлаш, экотизим, шаҳарсозлик, ландшафт, атроф-муҳит дизайни қурилиши билан шуғулланувчи компания вакиллари билан ҳам учрашувлар бўлиб ўтган.
Делегация аъзолари Жанубий Корея–Ўзбекистон бизнес уюшмаси раисининг биринчи ўринбосари Ким Чанг Кеон билан музокаралар ўтказган. Мулоқот давомида вилоятдаги «Ангрен ЭИЗ», «Чорвоқ ТИЗ», «Чирчиқ-Химград», «Бўстонлиқ Фарм», «Паркент Фарм» эркин иқтисодий зоналари имкониятлари, Нурафшон ситида қурилиш ва бунёдкорлик каби йўналишларда ҳамкорликни йўлга қўйиш юзасидан ҳамда туризм, таълим, яшил энергетика, озиқ-овқат маҳсулотлари, биофармацевтика ва нанотехнологиялар, электроника каби соҳаларни ривожлантириш борасида музокаралар олиб борилган.
Мулоқот якунида Тошкент вилояти ҳокимлиги ва Корея Республикасининг «Tashkent Development Corp» компанияси ўртасида 500 миллион долларлик «Nurafshon New Korea Busines City» лойиҳасини амалга ошириш бўйича меморандум имзоланган.
Изоҳ (0)