8 март “Халқаро хотин-қизлар куни” арафасида ўтказиб келинадиган “Сен азиз муқаддассан, аёл” концерт дастури 27 йилдан буён саҳнада. Баҳорнинг илк кунларида бўлиб ўтаётган ушбу концерт ҳамда ўзбек санъати вакиллари 8 мартни қандай ўтказиши ҳақидаги репортажни “Дарё”да томоша қилинг.
Ўзбекистон халқ артисти Гулсанам Мамазоитова барчани қўшалоқ байрам билан қутлади:
— Ҳаммани баҳор айёми ва келаётган аёллар байрами билан табриклаймиз. Кайфиятимиз баҳорий, гўзал! Ростини айтсам, менга бериладиган совғаларнинг барчаси бебаҳо, ҳаммаси унутилмас. Мухлислар ёки яқинлардан бирининг ҳадясини айтсам бири ҳафа бўлиб қолиши мумкин. Бир оғиз сўз ҳам инсоннинг кайфиятини кўтаради.
Ижоддаги янгиликларга келсак, ҳозир саҳнада янги қўшиғимни куйладим. Кетма кет янги тароналар яратяпмиз ва халққа тақдим қиламиз. Концерт кунини ҳам режа қилиб кетяпмиз, “Халқлар дўстлиги”да бўш кун бўлса, албатта, концерт бераман, дейди халқ артисти.
Пародист, қўшиқчи Олим ака ўз ҳазиллари билан барчанинг юзига кулги улашмоқда:
— Режиссёр Саъдулла ака бошчилигида “Муқаддас аёл” концерти учун 1 январдан буён тайёргарлик кўриб юрибмиз. Бу йилги сони ҳам ўзгача, файзли ўтяпти.
Мен 8 мартда яқинларимга фақат гул берганман. Эсда қоларлиси шу бўлган-ки, онаси, шу гул сенга, десам, “Гул? Пул, пул беринг, пул!” деган. Шу ҳеч ҳам эсимдан чиқмайди. Биламан, болаларни, бизни ўйлайди, нимадир сотиб олмоқчи бўлгандир. Аммо гулдай очилиб юринг деган маънода хурсанд қилмоқчи бўлганман.
14 январь “Ватан ҳимоячилари куни” ҳақида мен 15 январда билдим. Дадаси, кеча байрамингиз эди-а, ўтиб кетибди, деди аёлим. Майли дедим, биз ҳам одамдек гапмиз-да энди, дейди кулиб пародист.
“Бойлама”, “Нодира” каби қўшиқлари билан ўзи кирган саҳнани “ёндирадиган” хонанда Асилбек Амануллоҳ ҳам ўзининг сара қўшиқлари билан концертга ўзгача файз қўшди:
— Концерт ҳар йилгидек юқори кайфиятда ўтяпти. Биз ҳам смокингларда, жентелменлар хос келиб, ҳамкасблар билан дийдорлашиб, баҳорий энергия оляпмиз.
8 мартда яқинларимга асосан, гул, парфюм совға қиламан. Самолёт олиб бердим деб алдамайман (кулиб). Эл қатори чиройли нарсалар билан хурсанд қиламиз.
14 январда ҳеч нима олмадим, пайпоқ ҳам (кулиб). Туғилган куним ҳам сал аввалроқ бўлганди, ўшанда оила аъзоларим салютлар отиб, ажойиб табриклашди. Фурсатдан фойдаланиб, барча аёл-қизларни келаётган байрам билан қутлайман, умргузаронликда бахтли яшашларини тилаб қоламан, дейди хонанда.
Концертни тўлиқ ҳолда ушбу ҳавола орқали томоша қилишингиз мумкин.
Изоҳ (0)