8-mart “Xalqaro xotin-qizlar kuni” arafasida o‘tkazib kelinadigan “Sen aziz muqaddassan, ayol” konsert dasturi 27 yildan buyon sahnada. Bahorning ilk kunlarida bo‘lib o‘tayotgan ushbu konsert hamda o‘zbek san’ati vakillari 8-martni qanday o‘tkazishi haqidagi reportajni “Daryo”da tomosha qiling.
O‘zbekiston xalq artisti Gulsanam Mamazoitova barchani qo‘shaloq bayram bilan qutladi:
— Hammani bahor ayyomi va kelayotgan ayollar bayrami bilan tabriklaymiz. Kayfiyatimiz bahoriy, go‘zal! Rostini aytsam, menga beriladigan sovg‘alarning barchasi bebaho, hammasi unutilmas. Muxlislar yoki yaqinlardan birining hadyasini aytsam biri hafa bo‘lib qolishi mumkin. Bir og‘iz so‘z ham insonning kayfiyatini ko‘taradi.
Ijoddagi yangiliklarga kelsak, hozir sahnada yangi qo‘shig‘imni kuyladim. Ketma ket yangi taronalar yaratyapmiz va xalqqa taqdim qilamiz. Konsert kunini ham reja qilib ketyapmiz, “Xalqlar do‘stligi”da bo‘sh kun bo‘lsa, albatta, konsert beraman, deydi xalq artisti.
Parodist, qo‘shiqchi Olim aka o‘z hazillari bilan barchaning yuziga kulgi ulashmoqda:
— Rejissyor Sa’dulla aka boshchiligida “Muqaddas ayol” konserti uchun 1-yanvardan buyon tayyorgarlik ko‘rib yuribmiz. Bu yilgi soni ham o‘zgacha, fayzli o‘tyapti.
Men 8-martda yaqinlarimga faqat gul berganman. Esda qolarlisi shu bo‘lgan-ki, onasi, shu gul senga, desam, “Gul? Pul, pul bering, pul!” degan. Shu hech ham esimdan chiqmaydi. Bilaman, bolalarni, bizni o‘ylaydi, nimadir sotib olmoqchi bo‘lgandir. Ammo gulday ochilib yuring degan ma’noda xursand qilmoqchi bo‘lganman.
14-yanvar “Vatan himoyachilari kuni” haqida men 15-yanvarda bildim. Dadasi, kecha bayramingiz edi-a, o‘tib ketibdi, dedi ayolim. Mayli dedim, biz ham odamdek gapmiz-da endi, deydi kulib parodist.
“Boylama”, “Nodira” kabi qo‘shiqlari bilan o‘zi kirgan sahnani “yondiradigan” xonanda Asilbek Amanulloh ham o‘zining sara qo‘shiqlari bilan konsertga o‘zgacha fayz qo‘shdi:
— Konsert har yilgidek yuqori kayfiyatda o‘tyapti. Biz ham smokinglarda, jentelmenlar xos kelib, hamkasblar bilan diydorlashib, bahoriy energiya olyapmiz.
8-martda yaqinlarimga asosan, gul, parfyum sovg‘a qilaman. Samolyot olib berdim deb aldamayman (kulib). El qatori chiroyli narsalar bilan xursand qilamiz.
14-yanvarda hech nima olmadim, paypoq ham (kulib). Tug‘ilgan kunim ham sal avvalroq bo‘lgandi, o‘shanda oila a’zolarim salyutlar otib, ajoyib tabriklashdi. Fursatdan foydalanib, barcha ayol-qizlarni kelayotgan bayram bilan qutlayman, umrguzaronlikda baxtli yashashlarini tilab qolaman, deydi xonanda.
Konsertni to‘liq holda ushbu havola orqali tomosha qilishingiz mumkin.
Izoh (0)