Sudandagi fuqarolar urushi paytida qurollangan odamlar bir yoshga to‘lmagan bolalarga ham jinsiy tajovuz qilgan. Bu haqda Birlashgan Millatlar Tashkilotiga tayanib BBC xabar berdi.
Ommaviy jinsiy zo‘ravonlik mamlakatda deyarli ikki yil davom etib kelayotgan mojarolarda ommaviy tus olgan. YUNISEF hisobotiga ko‘ra, qurbonlarning uchdan biri o‘g‘il bolalar bo‘lib, ularning ota-onalari aynan shuning uchun bu haqda tegishli joyga arz qilishga ko‘pincha botina olishmaydi.
2024-yil boshidan beri bolalarga nisbatan 221 ta zo‘rlash holatlari rasman qayd etilgan, biroq haqiqiy raqam bundan ancha yuqori bo‘lishi mumkin.
YUNISEF hisoboti esa bu borada olib borilgan ilk tadqiqot hisoblanadi. Eng hayratlanarli jihat shundaki, qurbonlarning 16 nafari besh yoshgacha bo‘lgan, shu jumladan, to‘rttasi chaqaloq edi.
Hisobotda kim aybdorligi haqida aniq ma’lumot yo’q, biroq BMTning boshqa tergovlarida zo‘rlashlarning aksariyatida mahalliy harbiylarning qo’li borligi ochiqlanadi.
Sudanda hujjatlashtirilgan jinsiy zo‘ravonlikning katta miqyosda ekani hayratlanarli, dedi BMTning faktlarni aniqlash missiyasi rahbari Muhammad Chande.
BMT Sudanga hech qanday gumanitar yordamni moliyalashtirmagan. Bundan tashqari, yaqinda AQSHning yordami ham qisqartirilishi ma’lum qilindi. Bu ahvolning yanada chigallashishiga sabab bo‘ladi.
Kechasi to‘qqizdan keyin kimdir eshikni ochadi, qamchi ko‘tarib, qizlardan birini tanlaydi va uni boshqa xonaga olib boradi. Men qizimning yig‘layotganini va qichqirganini eshitdim, deb eslaydi Omnia (ismi o‘zgartirilgan), omon qolgan katta yoshli ayol.
Ta’kidlanishicha, bundan tashqari bir nechta ayol va qizlar bir xonada qurollangan erkaklar tomonidan ushlab turiladi.
Mamlakatda fuqarolar urushi sabab evakuatsiya qilinganlarning ko‘p qismini ayollar va bolalar tashkil qiladi. Har uch qizdan ikkisi maktabga bora olmaydi. Sog‘liqni saqlash tizimi ham tang ahvolda. Mojarolar sabab ko‘plab tibbiyot muassasalari vayron qilingan yoki urishayotgan tomonlar tomonidan egallab olingan.
Sudanda fuqarolar urushi
Sudandagi fuqarolar urushi 2023-yil aprel oyida boshlangan bo‘lib, mamlakatning harbiy kuchlari va harbiylashtirilgan tezkor harakatlar kuchlari o‘rtasidagi hokimiyat uchun kurash fonida yuzaga kelgan. Bu mojaro dunyodagi eng yirik gumanitar inqirozni keltirib chiqargan. Urushda 19 mingdan ortiq tinch aholi halok bo‘lgan, 10 milliondan ortiq kishi o‘z uylarini tashlab ketishga majbur bo‘lgan.
Izoh (0)