Ruminiyada mamlakat prezidentligiga nomzod va bekor qilingan saylovlarning birinchi bosqichi g‘olibi Kelin Jorjesku qo‘lga olindi.
Jorjesku yana prezidentlikka nomzodini qo‘ymoqchi edi. Taxminan 30 daqiqa oldin uni yo‘lda to‘xtatib, Bosh prokuraturada so‘roq qilish uchun ushlab qolishgan! Demokratiya qani, demokratiyani himoya qilishi kerak bo‘lgan hamkorlar qani?, deyiladi uning Facebook’dagi muloqot jamoasi xabarida.
Mediafax xabariga ko‘ra, nomzod konstitutsiyaviy tuzumga putur yetkazish maqsadida fashistik tashkilot tuzish va saylov kampaniyasini noqonuniy moliyalashtirish bilan bog‘liq ish doirasida hibsga olingan. News.ro manbalarining ma’lum qilishicha, Jorjesku gumonlanuvchi sifatida so‘roq qilinmoqda.
Ruminiyada prezidentlik saylovlari 24-noyabr kuni bo‘lib o‘tgan edi. Jorjesku birinchi turda 22,95 foiz ovoz to‘plagan. Ikkinchi bosqichda o‘ng markazchi “Ruminiya qutqaruv ittifoqi” partiyasi yetakchisi Yelena Laskoni 19,18 foiz natijaga erishgan. So‘rovlarga ko‘ra, mamlakat bosh vaziri, Sotsial-demokratik partiya (SDP) vakili Marchel Cholaku 19,15 foiz ovoz bilan uchinchi o‘rinni egallagan.
Jorjesku tarafdori bo‘lgan “Ruminiya birlashuvi uchun alyans” (AUR) partiyasi uning hibsga olinishi munosabati bilan Bosh prokuratura oldida aksiya o‘tkazishini ma’lum qildi.
Romania Journal nashrining yozishicha, bugun Jorjeskuning o‘nlab safdoshlari ham tintuv qilingan. Ruminiya politsiyasi “fashistik, irqchilik yoki ksenofobik xarakterdagi guruhni yaratish yoki tashkil etish bilan bog‘liq” ish doirasida tintuv o‘tkazganini ma’lum qildi.
Ruminiya Konstitutsiyaviy sudi Jorjesku saylovoldi kampaniyasiga qarshi ayblovlar tufayli saylov natijalarini bekor qilgan edi. U TikTok orqali o‘z nomzodini pul evaziga ilgari surganlikda gumon qilingan, bu Rossiya buyurtmasi bilan amalga oshirilishi mumkinligi haqida taxminlar ilgari surilgan. Biroq, Ruminiya soliq xizmati ANAF TikTok kampaniyasi Ruminiyaning Yevropaga xayrixoh Milliy Liberal partiyasi (PNL) tomonidan to‘langanini aniqlagan.
Yangi saylovlar joriy yilning 4-may kuni, ikkinchi tur, agar kerak bo‘lsa, 18-may kuni bo‘lib o‘tadi.
Izoh (0)