Бразилия Амазонкасининг шимоли-шарқий чеккасида жойлашган Буритикупу шаҳри аста-секин ер қаърига чўкиб бормоқда. Сўнгги ҳафталарда бир неча метр чуқурликдаги улкан чуқурлар пайдо бўлиши туфайли маҳаллий ҳокимият фавқулодда ҳолат эълон қилди. Бу ҳақда Reuters хабар берди.
Маълум қилинишича, 55 минг кишилик умумий аҳолидан 1,2 мингга яқини уйларининг қулаб тушиши хавфи остида қолган, бир нечта бино аллақачон вайрон бўлган.
Сўнгги бир неча ой ичида чуқурларнинг ўлчамлари геометрик прогрессия бўйича катталашиб, турар жой биноларига анча яқинлашиб қолди, дейилади шаҳар ҳокимияти томонидан чиқарилган фавқулодда қарорида.
Ердаги ўпирилишлар ёмғирлар натижасида юзага келган бўлиб, бу қумли табиати туфайли заиф бўлган тупроқларни аста-секин емиради. Бунга қўшимча равишда, режасиз қурилиш ишлари ва ўрмонларнинг кесилиши ҳам ўз таъсирини кўрсатган.
Буритикупулик жамоат ишлари вазири ва муҳандис Лукас Консейсао шаҳар ҳокимиятининг ер ўпирилиши билан боғлиқ мураккаб вазиятга ечим топиш имконияти йўқлигини айтди.
Изоҳ (0)