Жиноят ишлари бўйича Наманган вилоятининг Чуст тумани суди раиси Жаҳонгир Ёқубхўжаев ўз ёрдамчиси Шоҳжаҳон Яхшибоевни калтаклаб, унга жароҳат етказганликда гумонланмоқда.
Воқеа 2025 йилнинг 18 январь куни содир бўлган. “Кун.уз”нинг ёзишича, суд раиси Жаҳонгир Ёқубхўжаев ёрдамчиси Шоҳжаҳон Яхшибоевни ўзининг хизмат хонасида калтаклаган. Жароҳат олган ёрдамчи Тўрақўрғон туман тиббиёт бирлашмасига мурожаат қилган. Тиббий маълумотномада у юз соҳаси юмшоқ тўқималари лат ейиш жароҳатини олгани кўрсатилган.
Бош прокуратура ахборот хизмати раҳбари Ҳаёт Шамсутдинов ҳодиса юз берганини тасдиқлади ва Чуст туман прокуратураси томонидан терговга қадар текширув ҳаракатлари олиб борилаётганини маълум қилди.
Судьялар олий кенгаши ҳолат юзасидан хизмат текшируви тайинланганини билдирди.
Бундан аввал Жиноят ишлари бўйича Қашқадарё вилояти Яккабоғ туман судининг раиси Адолат Хамраева одобсизлик қилганига оид хабар тарқалганди. Олий суд раиси прокурор билан пичирлашган судьяларни танқид қилганди.
Изоҳ (0)