Қирғизистонда метапневмовируснинг икки ҳолати аниқланди. Бу ҳақда мамлакат Соғлиқни сақлаш вазирлиги матбуот хизматига таяниб, “24.кг” хабар берди.
Бугунги кунда республикада ўткир респиратор вирусли инфекциялар (ЎРВИ) устунлик қилмоқда. 2024 йил октябрдан декабрь ойигача 1 144 нафар беморнинг таҳлиллари ўтказилди. Олинган намуналар орасида 210 та риновирус, 259 та респиратор-сентисиал вирус, 105 та аденовирус, 79 та боковирус, 98 та парагрипп ҳам (асосан 3 ва 4-типлар) аниқланган.
Хитойда касалланишнинг кескин ўсиши
Хитойда респиратор вируслар билан касалланишнинг ошиши кузатилмоқда, бу эса шифохоналарнинг тўлиб кетишига олиб келмоқда. қишда Хитойнинг шимолий вилоятларида метапневмовирусга чалиниш кўпайган. Бу айниқса болалар орасида кенг тарқалган. Бир вақтнинг ўзида бир нечта вируслар, шу жумладан Mycoplasma pneumoniae ҳам қайд этилмоқда.
Касаллик Ўзбекистонда ҳам аниқланган
Айни вақтда республикада ўткир респиратор инфекцияларга чалиниш ҳолатларининг мавсумий кўтарилиши кузатилмоқда. Санепидқўмитага кўра, ушбу респиратор инфекцияларнинг сўнгги лаборатория таҳлиллари натижасига кўра: 36,9 фоизида грипп вируси, 30,2 фоизида риновирус, 28,6 фоизида респиратор-синситиал вирус, 1,2 фоизида метапневмовирус ва 3,1 фоизида бошқа вируслар аниқланган. Қўшни Қозоғистонда эса мазкур касалликка 30 киши чалинган.
HMPV нима?
Инсон метапневмовируси ёки HMPV нафас йўллари инфекциясини келтириб чиқарувчи вирус бўлиб, у оддий шамоллаш ва гриппга ўхшаш белгиларни юзага келтиради. Касаллик кўпинча енгил кечса-да, айниқса чақалоқлар, кексалар ва иммун тизими заифлашган кишиларда пневмония каби жиддий асоратларга олиб келиши мумкин.
Аслида вирус янги эмас, лекин Хитойнинг шимолида, айниқса 14 ёшдан кичик болалар орасида касалланиш ҳолатлари кўпайгани туфайли эътиборни тортди.
Биринчи марта 2001 йилда аниқланган HMPV бир занжирли РНК вируси бўлиб, нафас олиш томчилари ёки ифлосланган юзалар билан алоқа орқали тарқалади. Бу инфекциялар илгари ҳам Буюк Британия каби турли мамлакатларда қайд этилган.
Изоҳ (0)