G‘azo sektoridagi qochqinlar lagerida so‘nggi ikki kun ichida sakkiz nafar falastinlik sovuqda muzlab, vafot etdi. Bu haqda Qatarning Al Jazeera telekanali maʼlum qildi.
G‘azo sog‘liqni saqlash vazirligi rasmiysining so‘zlariga ko‘ra, G‘azoda yana bir chaqaloq gipotermiyadan vafot etdi. Shu tariqa sovuq havodan vafot etganlar soni sakkiz nafarga yetdi. Bir necha kun davom etgan shiddatli yomg‘irlar tufayli vaqtinchalik boshpanalarni suv bosgan, havo haroratining pastligi bois lagerlardagi odamlar muzlab qolishmoqda, dedi SSV rasmiysi.
O‘z navbatida, Falastinning WAFA axborot agentligi G‘azo fuqarolik mudofaasi departamentiga tayanib, kuchli yomg‘irlar o‘n minglab ko‘chirilgan oilalarning ahvolini og‘irlashtirganini qayd etadi.
Suv toshqini oqibatida 1500 dan ortiq chodirlar suv ostida qolgan, qochqinlar sovuq havoda suv bosgan kiyimlar bilan qolgan. G‘azodagi ko‘chirilganlarning ko‘pchiligida qishki kiyimlar yo‘q.
Izoh (0)