“Ал-Ҳилол” Саудия Суперкубоги ярим финалида “Ан-Насср”ни мағлуб этди, Роналду қизил карточка олди

Футбол бўйича Саудия Арабистони Суперкубоги ярим финал баҳслари 8 апрель, душанба куни бўлиб ўтди. 

“Ал-Ҳилол” финал йўлланмаси учун “Ан-Насср”га қарши ўйнади. Учрашувнинг биринчи бўлимида дарвозалар дахлсизлиги сақланиб қолди. Иккинчи бўлимда эса “Ал-Ҳилол” ҳисобни очди. 61-дақиқада Ад-Досари ўз номини таблога ёздириб қўйди. 72-дақиқада Малком учрашувдаги иккинчи гол муаллифига айланди. 86-дақиқада эса Криштиану Роналду қизил карточка олиб, майдонни тарк этди. 

90+9-дақиқада эса Садио Мане ҳисобни қисқартиришга муваффақ бўлди. 

Ўйин “Ал-Ҳилол”нинг 2:1 ҳисобидаги ғалабаси билан якунланди. 

Яна бир ярим финал ўйинида “Ал-Иттиҳод” “Ал-Ваҳда” билан баҳс олиб борди. Учрашувнинг илк дақиқасидаёқ Карим Бензема ҳисобни очди. Биринчи бўлим охирида эса Ҳамдалла ҳисобни ишончли кўринишга олиб келди.

Иккинчи бўлимда эса хавфли вазиятлар бўлса-да, 90-дақиқагача дарвозалар ишғол этилмади. 90+7-дақиқада Исса ҳисобни қисқартирди. Бироқ бу гол “Ал-Иттиҳод”ни финалга чиқишига қаршилик қила олмади. 

Шу тариқа “Ал-Ҳилол” ва “Ал-Иттиҳод” финалда ўзаро баҳс олиб боради. Улар ўртасидаги учрашув 11 апрель санасида бўлиб ўтади.

Саудия Суперкубоги

Ярим финал 

8 апрель, душанба

“Ал-Ҳилол” –“Ан-Насср” 2:1

Голлар: Ад-Досари (61), 2:0 – Малком (73), 2:1 — Садио Мане (90+9).

“Ал-Иттиҳод” –“Ал-Ваҳда” 2:1

Голлар: 1:0 – Бензема (1), 2:0 – Ҳамдалла (42), 2:1 – Исса (90+7).