Bugun, 5-dekabr kuni Toshkentda joriy yilgi O‘zbekiston parlament saylovlari natijalarini baholash hamda yangi parlamentning fuqarolik jamiyatining islohotlarni ilgari surishdagi roliga bag‘ishlangan xalqaro anjuman bo‘lib o‘tdi. Ishtirokchilar tomonidan siyosiy raqobat darajasi, yangi parlament tarkibi va uning mamlakat kelajagini shakllantirishdagi o‘rni tahlil qilindi. Tadbirda spiker sifatida qatnashgan “Daryo” muxbiri Toni Kryuger saylov natijalari xalq irodasini qanchalik aks ettirgani, yangi parlament siyosiy pluralizm va inklyuzivlik tomon siljishni namoyish qilgani yuzasidan o‘z munosabatlarini bildirdi. Ishtirokchilarning fikriga ko‘ra, O‘zbekiston global va mintaqaviy integratsiyaga intilayotgan bir davrda ushbu savollarni atroflicha muhokama qilish zarur. 2024-yilgi parlament saylovlari hal qilinishi lozim bo‘lgan qiyinchiliklarni ham ochib berdi.
“Muammolarni yechish taraqqiyotdan darak, deydi Senat raisining birinchi o‘rinbosari Sodiq Safoyev. — Hozirgi parlament, payti kelganda murakkab qarorlarni qabul qilishga tayyor davlat organi bo‘lishi lozim. Vazirlar Mahkamasi tomonidan mexanizmi keyinchalik ishlab chiqiladigan emas, to‘g‘ridan to‘g‘ri ishlaydigan qonunlarni qabul qilish vaqti keldi va u albatta, professionallikni talab qiladi. Germaniya va boshqa mamlakatlar tajribasidan bilamizki, bu nihoyatda murakkab hujjat. Parlament tekshiruvlari va nazoratini nafaqat ijtimoiy, balki kengroq — energetika, ekologiya, tashqi siyosat va xavfsizlik masalalari ko‘lamida yaratish kerak va barcha sohalarda xalq vakillari o‘z ovozini bildirishi zarur”.
Progressiv islohotlar markazi tomonidan o‘tkazilgan sotsiologik so‘rov natijalari shuni ko‘rsatdiki, fuqarolarning saylangan vakillardan kutganlari bilan saylov natijalari o‘rtasida sezilarli tafovutlar mavjud. Siyosiy xilma-xillik, ijtimoiy ustuvorliklarga moslashuv hamda iqtisodiy tengsizlik, ijtimoiy inklyuzivlik va gender tengligi kabi muhim masalalar bo‘yicha kuchliroq siyosat olib borishga bo‘lgan talab ortib bormoqda.
O‘zbekiston siyosiy islohotlar yo‘lida muhim yutuqlarga erishgan bo‘lsa-da, jamoatchilik kutuvlari va xalqaro standartlarga javob berish uchun yana ko‘p ishlarni amalga oshirish zarur. Mutaxassislar parlament faol va mustaqil institutga aylanishi kerakligini ta’kidladilar. Bu esa islohotlarni nafaqat amalga oshirish, balki ularning to‘g‘ri nazorat qilinishi va baholanishini ta’minlashni ham talab etadi.
Komila Qalandarova tayyorladi.
Izoh (0)