O‘zbekiston qonunchiligida 2024-yil 1-dekabrdan bir qator o‘zgarish va yangiliklar kuchga kiradi. Quyida ushbu sanadan kuchga kiradigan asosiy o‘zgarishlar taqdim etildi.
Mehnat migrantlari uchun kasblar va xorijiy tillarga o‘qitish kurslari tashkil etiladi
Migratsiya agentligi ta’lim tashkilotlariga xorijda ishlashni istagan fuqarolarni kasblarga va xorijiy tillarga o‘qitish bo‘yicha buyurtmalar joylashtiradi.
Ichimlik suvi uchun to‘lovlar faqat elektron shaklda qabul qilinadi
Sohada shaffoflikni ta’minlash hamda korrupsion holatlarga barham berish maqsadida respublika miqyosida ichimlik va oqova suv xizmatlari uchun to‘lovlarni faqat elektron shaklda qabul qilish tizimiga o‘tiladi.
Kambag‘al oilalar reyestri shakllantiriladi
“Mahalla yettiligi” tomonidan kambag‘al oilalarning ijtimoiy sharoiti va kambag‘allikka tushish sabablarini o‘rganish natijasida Ijtimoiy himoya milliy agentligi tomonidan Kambag‘al oilalar reyestri shakllantiriladi.
Uy-joyni yaxshilash uchun kreditga arizalar qabuli boshlanadi
Uy-joy sharoitini yaxshilashga muhtoj bo‘lgan shaxslarga yakka tartibdagi uy-joyni qurish, rekonstruksiya qilish va taʼmirlash maqsadlari uchun 120 million so‘mgacha ipoteka krediti ajratishga arizalar qabuli boshlanadi.
Ijtimoiy to‘lovlar – “Ijtimoiy karta” orqali
Yangi tayinlanadigan ijtimoiy to‘lovlar, xizmatlar va imtiyozlar, shu jumladan, protez-ortopedik buyumlar va reabilitatsiya texnik vositalarini xarid qilish “Ijtimoiy karta” axborot tizimidan foydalangan holda ijtimoiy karta orqali amalga oshiriladi.
Avtoraqamlar uchun to‘lov qilish osonlashtiriladi
Endilikda avtomototransport vositalarini davlat ro‘yxatidan o‘tkazish va ularga raqamlar berish bo‘yicha murojaat qilish va to‘lovni amalga oshirish YHXX mobil ilovasi, rasmiy veb-sayti, Call-markazi yoki YIDXP orqali amalga oshirilishi mumkin.
Himoya orderini berish holatlari kengaytiriladi
Bir kalendar yil davomida ikki va undan ortiq marta tazyiq va zo‘ravonlik holati bo‘yicha murojaat qilinganda ichki ishlar organlari tomonidan himoya orderi tashabbus tartibida beriladi.
Majburiy ijro byurosi “Majburiyatlar reyestri”ni yuritadi
Sud hujjatlari va boshqa organlar hujjatlarining so‘zsiz ijrosini ta’minlovchi “Majburiyatlar reyestri” instituti joriy etiladi.
Bunda:
- qarzdor mol-mulki yo‘qligi sababli undiruv amalga oshirish imkoniyati bo‘lmaganda, u haqidagi ma’lumotlar majburiy tartibda reyestrga kiritiladi;
- qarzdor haqida ma’lumot reyestrga kiritilgandan keyin unga nisbatan ijro ishi doirasida qo‘llanilgan barcha cheklovlar saqlab qolinadi;
- reyestrga kiritilgan qarzdorning mol-mulki va pul mablag‘lari aniqlanganda majburiy ijro harakatlari davom ettiriladi.
Meva-sabzavot mahsulotlari yetishtiruvchilarni baholash tizimi joriy etiladi
Fermer va dehqon xo‘jaliklarining nufuzini oshirish, qayta ishlovchi va eksport qiluvchi korxonalarga ko‘maklashishga qaratilgan “meva-sabzavot mahsulotlari yetishtiruvchilarni baholash” tizimi joriy etiladi.
Izoh (0)