“Ўзгидромет” иш ҳафтаси давоми кузатиладиган об-ҳаво ҳақида маълумот берди.
Унга кўра, 28 октябрь, душанба куни Ўзбекистон ҳудуди совуқ ва нам ҳаво массалари таъсири остида бўлади. Куннинг биринчи ярмида Тошкент, Самарқанд, Жиззах, Сирдарё вилоятлари ва Фарғона водийси вилоятларида баъзи жойларда ёмғир ёғади, республиканинг қолган ҳудудларида ёмғир ёғиши эҳтимоли кам. Ҳаво ҳарорати кундузи 8-13 даражадан кўтарилмайди, бу ўртача кўп йиллик қийматлардан 8-10 даражага пастдир.
Сешанба куни Ўзбекистон бўйича ёғингарчилик кутилмайди, фақат Қорақалпоғистон Республикаси бўйича баъзи жойларда бир оз ёмғир ёғиши мумкин. Ҳаво ҳарорати кечаси 0-5 даража илиққача, баъзи жойларда 2 даража совуққача пасаяди, кундузи 10-15 даражагача кўтарилади.
Чоршанба куни фақат Қорақалпоғистон Республикасида, шунингдек кечаси ва эрталаб Тошкент вилоятида бир оз ёмғир ёғиши эҳтимоли бор. Совуқ ҳаво массаси мамлакатимиз ҳудудидан чекина бошлайди, ҳарорат кечаси 2-7 даражагача, кундузи 12-17 даражагача кўтарилади.
Пайшанба ва жума кунлари Ўзбекистон бўйича қуруқ ва илиқ об-ҳаво бўлиши прогноз қилинмоқда. Ҳаво ҳарорати кечалари 2-7 даража илиқ, атрофида бўлади, кундуз кунлари 15-20 даражагача кўтарилади.
28—30 октябрда республика бўйича баъзи жойларда туман тушиши кузатилади. 28—30 октябрда республиканинг тоғолди ва тоғли ҳудудларида вақти-вақти билан ёғингарчилик (ёмғир, қор) бўлади.
Тошкентда душанба куни куннинг биринчи ярмида вақти-вақти билан ёмғир ёғади. Ҳаво ҳарорати кундузи 10-12 даражадан кўтарилмайди. Сешанба куни ёғингарчилик кутилмайди, кечаси ва эрталаб туман тушиши мумкин. Ҳарорат кечаси 3-5 даража илиқ, кундузи 12-14 даража бўлади. 30 октябрда кечаси ва эрталаб бир оз ёмғир ёғади, кундузи ёғингарчилик кутилмайди. Ҳарорат кечаси 4-6 даража илиқ, кундузи 13-15 даража бўлади. 31 октябрда ёғингарчилик кутилмайди. Ҳарорат кечаси 4-6 даража илиқ, кундузи 16-18 даража бўлади.
Изоҳ (0)