2024/2025-ўқув йилида ОТМларнинг айрим бакалавриат ҳамда магистратура талабалари учун тўловларни амалга ошириш ва талабалар сафига қабул қилишни расмийлаштиришнинг муддати 1 декабргача узайтирилди. Бу ҳақда Олий таълим, фан ва инновациялар вазирлиги хабар берди.
Қуйидаги талабалар учун муддат узайтирилган:
- базавий ёки табақалаштирилган тўлов-контракт асосида ўқиш истагини билдирган абитуриентлар (1-босқич);
- қорақалпоғистонлик ёшлар учун ажратилган қўшимча қабул квоталарига талабаликка тавсия этилган абитуриентлар (1-босқич);
- ўқиши кўчирилган (кўчириб тикланган) талабалар.
Бунда қабул параметри доирасида ўқишга тавсия этилган абитуриентлар базавий тўлов-контракт шаклида бир йиллик ўқитиш қийматининг камида 25 фоизини тўлаши лозим.
Шунингдек, табақалаштирилган тўлов-контракт (супер) асосида ўқиш истагини билдирганлар улар учун белгиланган бир йиллик ўқитиш қийматининг камида 50 фоизи миқдоридаги тўловларни амалга оширади.
Изоҳ (0)