Йил давомида автобусларда йўл ҳақини тўламасдан юрган йўловчилар сони маълум қилинди

Автобусда йўл ҳақини тўламасдан юрган йўловчилар ҳамда нақд пулда тўловни амалга оширганда чипта тақдим этмаган чиптачилар аниқланиб, уларга нисбатан маъмурий баённомалар расмийлаштирилмоқда. Бу ҳақда Транспорт вазирлиги ахборот хизмати “Дарё”га маълум қилди.

Айтилишича, йўловчининг шаҳар ичида ва шаҳар атрофида қатнайдиган автобусда чиптасиз юриши Маъмурий жавобгарлик тўғрисидаги кодекснинг тегишли моддасига асосан жавобгарликка сабаб бўлади.

Жорий йилнинг ўтган даврида Маъмурий жавобгарлик тўғрисидаги кодекснинг 144-модда (транспортда чиптасиз юриш) 2-қисми бўйича 62 та ҳолатда баённома расмийлаштирилган.

Маъмурий жавобгарлик тўғрисидаги кодекснинг 145-модда (йўловчиларни чиптасиз ташиш) 2-қисми (сув, автомобиль транспортида ва шаҳар электр транспортида йўловчиларни чиптасиз ташиш) бўйича 652 та ҳолатда маъмурий иш қўзғатилган.

Маълумот учун, қонунчиликка кўра йўловчининг троллейбусда, трамвайда, шаҳар ичида ва шаҳар атрофига қатнайдиган автобусда чиптасиз юриши — БҲМнинг ўндан бир қисми (37 минг 500 сўм) миқдорида жарима солишга сабаб бўлади.

Сув, автомобиль транспортида ва шаҳар электр транспортида йўловчиларни чиптасиз ташиш — БҲМнинг икки бараваридан (750 минг сўм) уч бараваригача (1 миллион 125 минг сўм) миқдорда жарима солишга сабаб бўлади.