Қозоғистонда Марбург вируси хавфи туфайли назорат кучайтирилмоқда. Бу ҳақда мамлакат Соғлиқни сақлаш вазирлигига таяниб, “KazTAG” хабар берди.
Касалликнинг республикага кириб келиши ва тарқалишига йўл қўймаслик мақсадида халқаро аэропортларда давлат чегарасида санитария-карантин назорати амалга оширилади, барча келаётган йўловчилар контактсиз термометриядан ўтказилади, деди республикаси бош давлат санитария врачи Сархат Бейсенова.
Марбург вируси Эбола оиласига мансуб ва клиник жиҳатдан унга ўхшайди. У геморрагик безгакни келтириб чиқарувчи вирусли касалликдир. Инфекция касалланган одамларнинг биологик суюқликлари билан бевосита алоқа қилиш, шунингдек, юзалар ва материаллар орқали юқади. Вирус билан оғриган беморларда кучли бош оғриғи, қорин оғриғи, бурун ва оғиздан қон кетиши каби аломатлар кузатилади. Вирусдан ўлим даражаси 88 фоизга етади.
Марбург иситмасининг табиий ўчоқлари Жанубий, Ғарбий ва Марказий Африка мамлакатларида жойлашган. Касалликнинг клиник белгилари вирус юққанидан 2-21 кун ўтгач намоён бўлади. Жаҳон соғлиқни сақлаш ташкилоти Марбург вирусининг глобал эпидемияси хавфидан огоҳлантирган.
Изоҳ (0)